अबदेखि ‘अध्यापन अनुमतिपत्र’ को परीक्षा विषयगत हुने

काठमाडौं, पुष १४ । शिक्षक सेवा आयोगले अबदेखि शिक्षकका लागि विषयगत अध्यापन अनुमतिपत्र दिने भएको छ । आयोगले अब लिइने अध्यापन अनुमतिपत्रको परीक्षा विषयगतरुपमा लिने भएको छ ।

शिक्षकलाई विषयमा विशिष्टीकरण ल्याउनका लागि अबदेखि विषयगतरुपमा अध्यापन अनुमतिपत्र वितरण गर्ने आयोगका सूचना अधिकारी रामराज खकुरेलले जानकारी दिए ।

विषयगत अध्यापन अनुमतिपत्रका लागि आयोगले पाठ्यक्रम पठाउन थालेको छ । “ आयोगले खुलाएको विज्ञापनमा पहिले सबै विषयका लागि एउटै अध्यापन अनुमतिपत्रले प्रतिस्पर्धा गर्ने गरेका थिए”, उनले भने, “अबदेखि भने विषयगत अध्यापन अनुमतिपत्र वाहकले मात्र सम्बन्धित विषयमा प्रतिस्पर्धा गर्न पाउनेछन् ।”

सरकारले शिक्षा ऐन २०२८ को सातौं संशोधनपश्चात् विसं २०५९ देखि शिक्षक अध्यापनका लागि अनिवार्य अध्यापन अनुमतिपत्रको व्यवस्था गरेको थियो । आयोगले अहिलेसम्म करीब पाँच लाखलाई शिक्षक अध्यापन अनुमतिपत्र वितरण गरेको छ । रासस

कमेन्ट गर्नुहोस्