Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

ठेकेदारको कारण समयमै चामल नपुग्दा बाजुरामा खाद्य सङ्कट

बाजुरा, चैत १५ । बाजुरामा समयमै ठेकेदारले चामल ढुवानी नगर्दा खाद्य सङ्कट भएको छ ।

जिल्लाको हिमाली गाउँपालिकामा खाद्य सङ्कट भएको हो । ठेकेदारले चामल ढुवानी गर्न असोजमा सम्झौता गरेको भए पनि अहिलेसम्म गाउँपालिकाको कवाडी डिपोमा चामल ढुवानी भएको छैन । चामल ढुवानी नहुँदा गाउँपालिकामा चरम खाद्य सङ्कट भएको वडा नं ५ का अध्यक्ष अम्मलाल कार्कीले बताए ।

हिमाली–३, बिच्छ्ँयाका चन्द्रबहादुर बुढथापाले चामल खरिदका लागि आए पनि नपाएपछि रित्तो हात घर फर्केको बताए । बिच्छ्ँयामा चार हजार जनसङ्ख्या रहेको छ । धेरैजसो घरमा खाद्य सङ्कट भएको उनले बताए ।

त्यस्तै चामल ढुवानी नभएपछि वडा नं १, २ र ३ का बिच्छँया तथा ४ र ५ को रुगिनमा खाद्य सङ्कट भएको स्थानीयवासी बताउँछन् । वडा नं २ बिच्छ्याकी जुनकला बुढाले चामल किन्न दुई दिन लगाएर कवाडी डिपोमा पुगेको तर त्यहाँ एक दाना पनि चामल नपाएपछि रितो हात फर्कनुपरेको दुखेसो पोखिन् ।

कवाडी डिपोका लागि खाद्य संस्थान बाजुराले यो वर्षमात्र छ हजार क्विन्टल चामलको कोटा स्वीकृत गरेको छ । सोहीअनुसार तीन ठेकेदारले असोजमा सम्झौता गरेका थिए तर, अहिलेसम्म एक हजार ५०० क्विन्टल मात्र पुगेको जिल्ला प्रशासन कार्यलय बाजुराले जनाएको छ । तीन हजार क्विन्टल नन्द महतारा, दुई हजार क्विन्टल नरी थापा र एक हजार क्विन्टल बलबहादुर थापाले ढुवानी गर्ने सम्झौता गरेका थिए । कोल्टी खाद्य संस्थान डिपो, मार्तडी खाद्य संस्थान र धनगढीबाट एक–एक हजार क्विन्टल तथा सुर्खेतबाट तीन हजार क्विन्टल कवाडीमा ढुवानी गर्ने सम्झौता भएको थियो ।

चामल ढुवानी नगर्ने ठेकेदारलाई ताकेता गरिरहेको नेपाल खाद्य संस्थान बाजुरा शाखा प्रमुख मेखराज ओझाले बताए । प्रमुख जिल्ला अधिकारी चेतराज बरालले पनि चामल अभाव भएको जानकारी भएलगत्तै खाद्य संस्थान र ठेकेदारलाई जानकारी गराएर चाँडै चामल पठाउने व्यवस्था गरेको उनले बताए ।

हिमाली गाँउपालिका जिल्लाकै सबैभन्दा विकट गाउँपालिका हो । यो गाउँपालिका पुग्न सदरमुकाम मार्तडीबाट एक साता लाग्छ । अनलाइनखबरबाट

कमेन्ट गर्नुहोस्

%d bloggers like this: