परीक्षामा सहभागी हुन नदिएको भन्दै प्रदर्शनमा उत्रिए नेविसंघका कार्यकर्ता

काठमाडौं, चैत १७ । पोखरा विश्वविद्यालय अन्तर्गतका केही कलेजहरुले भर्ना लिएका विद्यार्थीहरुलाई परीक्षामा सहभागी हुनबाट बञ्चित गराएको भन्दै प्रदर्शनमा उत्रिएका नेपाल विद्यार्थी संघ (नेविसंघ)का कार्यकर्ताहरुलाई प्रहरीले नियन्त्रणमा लिएको छ ।

नियमविपरित भर्ना लिएको तर परीक्षाबाट बञ्चित गराएको भन्दै आइतबार काठमाडौंको मध्य बानेश्वरस्थित एपेक्स कलेज, एसएआईएम कलेज, राजधानी मोडल कलेजलगायतका कलेजमा प्रदर्शन गरिरहेका नेविसंघका कार्यकर्तालाई प्रहरीले नियन्त्रणमा लिएको हो । विद्यार्थीहरुले चर्को फी असुली गरेर नियम विपरित भर्ना लिने तर परीक्षा दिनबाट बञ्चित गराएको भन्दै ती कलेजहरुमा ‘माफिया’ लेख्ने र तोडफोड समेत गर्ने प्रयास गरेपछि प्रहरीले उनीहरुलाई नियन्त्रणमा लिएको हो । नियम विपरित भर्ना लिने तर परीक्षा दिनबाट विद्यार्थीहरुलाई वञ्चित गराउने शैक्षिक दलाल र माफिया विरुद्ध प्रदर्शन गर्नुपरेको नेविसंघका केन्द्रीय सदस्य नवराज त्रिपाठीले बताए ।

याे पनि पढ्नुस  ब्यवसायिक कुखुरापालन तालिम सम्पन्न

त्रिपाठी नेतृत्वको नेविसंघका कार्यकर्ताहरुले ती कलेजहरुमा भर्ना भएका विद्यार्थीहरुलाई परीक्षा दिने व्यवस्था नगरे ती क्याम्पस संचालकलाई कालोमोसो दल्ने लगायतका आन्दोलनका कडा कार्यक्रम सार्वजनिक गर्न बाध्य हुने चेतावनी पनि दिएका छन् ।

पोखरा विश्वविद्यालय अन्तर्गतका विभिन्न कजेलहरुमा भर्ना भएका ३ सय ९१ जना विद्यार्थीले स्नातक तह तेस्रो वर्षको परीक्षा दिन नपाउने भएपछि त्यसको विरोधमा नेविसंघका विद्यार्थीहरुले प्रदर्शनसहितको आन्दोलन सुरु गरेका हुन । सबैभन्दा महंगो शुल्क लिने तर परीक्षा दिन पाउने काम शैक्षिक माफियाहरुबाट भएको भन्दै क्याम्पस संचालकहरुविरुद्ध चर्का नाराबाजी समेत गरेका थिए । नयाँपत्रिकादैनिकबाट

कमेन्ट गर्नुहोस्