नयाँ वर्षबाट ‘जेम्स वल्र्ड फनपार्क’ सञ्चालनमा, अध्यक्ष प्रचण्डबाट उद्घाटन गरिने

चितवन, चैत २४ । ‘भेटघाट ग्रुप’ले दुई वर्षको अध्ययनपछि चितवनमै पहिलोपटक नेपालकै सबैभन्दा ठूलो फनपार्क निर्माण गरिरहेको छ ।

भरतपुर ४, लंकूस्थित ‘जेम्स वल्र्ड फनपार्क’को नाममा आगामी वैशाख १ गतेबाट सञ्चालनमा ल्याउने तयारी सहित तीव्रगतिमा निर्माण कार्य भइरहेको छ । ग्रुपका अनुसार फनपार्क सञ्चालनमा आएपछि एकैपटकमा ४ हजार ५ सय मानिसले एकैसाथ सेवा लिन सक्ने छन् । २५ करोड रूपैयाँको लगानीमा निर्माण भइरहेको फनपार्कमा १०० भन्दा बढी खेल समावेश गरिनेछ ।

भेटघाट ग्रुपका अध्यक्ष महेश तिवारीका अनुसार ४ प्रकारको टिकट सुविधा हुनेछन् । १० हजार रूपैयाँमा प्रिभेन्स कार्ड र उक्त कार्ड लिएका व्यक्तिले कार्डको आधारमा वर्षभरि नै निःशुल्क सेवा लिन पाउने व्यवस्था मिलाइएको उनले बताए ।
‘उक्त कार्ड लिएर अन्य व्यक्ति आउँदासमेत हामीले १५ प्रतिशत छूट दिने व्यवस्था मिलाएका छौँ’, उनले भने, ‘नयाँवर्षको अवसरमा वैशाख महिनाभरिका लागि २५ प्रतिशत छूटको व्यवस्था गरेका छौँ ।’

समृद्ध महानगरको परिकल्पनासहित स्थानीय सरकारले काम गर्न लागिरहेको बेलामा भरतपुरभित्रै ठूलो लगानीमा व्यवसाय सञ्चालन हुनु सकारात्मक काम भएको आयोजकको दाबी छ । अध्यक्ष तिवारीका अनुसार फनपार्कले अन्तर्राष्ट्रियस्तरको मान्यता प्राप्त गरिसकेको छ । ६६ जनालाई प्रत्यक्ष रोजगारी दिने गरी काम गरिएको उनको भनाइ छ ।

करिब तीन विघा क्षेत्रफलमा फैलिएको फनपार्क निर्माणका लागि भेटघाट समूहको ५१ प्रतिशतसहित ६९ जना शेयर सदस्य छन् । चितवनको पर्यटन विकाससँगै अन्य विकासका गतिविधिका लागि पनि फनपार्कले ठूलो मद्दत पुर्याउने फनपार्कका संरक्षक गोविन्द तिवारीले दाबी गरे ।

शहिदचोकबाट करिब साढे ३ किलोमिटर र २४ कोठीबाट पश्चिमतर्फ साढे दुई किलोमिटरको दूरीमा रहेको उक्त फनपार्क यही चैत २८ गते पूर्वप्रधानमन्त्री पुष्पकमल दाहाल ‘प्रचण्ड’बाट उद्घाटन गर्ने तयारी भइरहेको आयोजकले जनाएको छ ।

कमेन्ट गर्नुहोस्

%d bloggers like this: