पूर्व प्रधानमन्त्री खनालः ठूलो संख्यामा युवाहरु बिदेसिनुमा नेपाली कांग्रेस जिम्मेवार छ

काठमाण्डौ, चैत ३० । पूर्व प्रधानमन्त्री तथा नेकपाका नेता झलनाथ खनालले ठूलो संख्यामा युवाहरु बिदेसिनुमा नेपाली कांग्रेस जिम्मेवार रहेको आरोप लगाए । काठमाण्डौ महानगरपालिका वडा नम्बर १५ले नयाँ वर्षको सन्दर्भमा शनिबार भुइँखेलमा गरेको कार्यक्रममा सत्तारुढ दल नेकपाका नेता एवं पूर्व प्रधानमन्त्री खनालले सरकारको नेतृत्वमा रहेका बेला नेपाली कांग्रेसले केही गर्न नसकेका कारण युवा जनशक्ति बिदेसिन बाध्य भएको बताए ।

२०४६ साल यता पटक पटक सरकारको नेतृत्व गरेको कांग्रेसले अवसर पाउँदा मुलुक र मुलुकवासीका लागि उपलब्धिमूलक काम गर्न नसकेको टिप्पणी गरे । उनले भने, ‘नेपाली कांग्रेसका साथीहरुले हामी गर्छौँ भनेर अहिले गफ लगाउनु भयो । तर ४६ साल पछाडि अवसर प्राप्त भएको हैन ? पटक पटक बहुमत प्राप्त भएको होइन । तर के गर्नुभो ? सारा देशलाई गरिबीमा डुबाउनुभयो । सारा देशमा बेरोजगारीमा डुबाउनु भो । आज झण्डै ५० लाख भन्दा बढी युवाहरु विदेशमा जान बाध्य भइरहेका छन् । यो बाध्यता खडा गर्‍यो कसले ? नेपाली कांग्रेसका साथीहरुलाई म एक पटक आफ्नो अनुहार ऐनामा हेर्न भन्न चाहन्छु ।’

पछिल्लो समय पूर्वाधार निर्माण, साधन स्रोतको विकास तथा जलस्रोतको विकासका लागि योजनाबद्ध ढंगले अघि बढ्ने काम भएको भन्दै उनले सरकारलाई असफल पार्न गरिएका षडयन्त्रविरुद्ध दृढताका साथ उभिनुपर्नेमा जोड दिए। पछिल्लो समय लोडसेडिङ गराउने तत्व सक्रिय भएको भन्ने खबर आएको भन्दै उनले त्यस किसिमको षडयन्त्रविरुद्ध दृढताका साथ उभिन सरकार र नेपाल विद्युत् प्राधिकरणलाई आग्रह गरे ।

कार्यक्रममा काठमाण्डौ महानगरका मेयर विद्यासुन्दर शाक्यले महानगरको शान्ति सुरक्षा कायम गर्दै सभा स्वच्छ, हराभरा बनाउनका लागि विशेष अभियान सुरु गरिएको बताए। उनले सीसी क्यामेरामार्फत आपराधिक गतिविधि मात्रै नभइ नगरलाई फोहर बनाउनेहरुको पनि निगरानी गरिने र उनीहरुलाई फोटोसहित सार्वजनिक अभिनन्दन गर्ने कार्यक्रम महानगरले अघि सारेको बताए । कार्यक्रममा उपमेयर हरिप्रभा खड्गीले ढल निकास, खानेपानी, विद्युत लगायतलाई महानगर मातहत नराखेसम्म महानगरको सम्मुन्नत विकास गर्न नसकिने बताए ।

कार्यक्रममा नागरिकका लागि निस्शुल्क स्वास्थ्य परीक्षणको व्यवस्था मिलाउन सामुदायिक स्वास्थ्य सेवा परिषद्लाई १२ लाख रुपैयाँको चेक हस्तान्तरण गरिएको थियो । वडा नम्बर १५ ले जेष्ठ नागरिकलाई निशुल्क स्वास्थ्य सेवा उपलब्ध गराउनका लागि वार्षिक १२ लाख रुपैयाँ दिने भएको हो । सोही कार्यक्रमको सुरुवात स्वरुप कार्यक्रममा दुई जना वृद्धवृद्धालाई निशुल्क स्वास्थ्य परीक्षणको परिचयपत्र हस्तान्तरण गरिएको थियो । यो समाचार उज्यालोबाट लिइएको हो ।

कमेन्ट गर्नुहोस्