यू–१९ छनोटः यूएईसँग नेपाल १ रनले पराजित

काठमाडौं, चैत ३० । आईसीसी यू–१९ विश्वकपको एसिया छनोटमा नेपाल एक रनले पराजित भएको छ । किनरारा ओभल मैदानमा टस हारेर पहिले ब्याटिङ पाएको नेपालले ५० ओभरमा २ सय ४७ रन बनाएको थियो । नेपालले सुरुवातमा राम्रो गर्न सकेन । २२ रन हुँदा नेपालका ओपनर पवन सराफ १२ रनमा आउट भए । त्यसपछि दोस्रो विकेटका लागि रित गौतम र आसिफ शेखले ४७ रनको साझेदारी गर्दै सम्हाल्ने प्रयास गरेका थिए ।

तर आसिफ २७ रनमा आउट भएपछि नेपालले ६९ रनमा दोस्रो विकेट गुमायो । त्यसपछि कप्तान रोहितकुमार पौडेल पनि ब्यक्तिगत १८ रनमा पेभेलियन फर्किदा नेपालले स्कोरबोर्डमा ९७ रन बनाएको थियो । त्यसपछि भने नेपालले अरु १८ रन जोड्दा थप दुई विकेट गुमायो । जसका कारण नेपालले एक सय १५ मा ५ विकेट खेर फाल्यो । सन्दिप जोरा मात्र चार रनमा आउट भए भने रित गौतम ४४ रनमा पेभेलियन फर्किए ।

छैटौ विकेटका लागि डेब्यु गरेको हरी चौहान र भिम सार्कीले ९२ रनको साझेदारी गर्दै टिमलाई बलियो स्थितिमा पुर्‍याए । तर भिम ५३ रनमा आउट हुन पुगे । उनले ५४ बलमा चार चौका र दुई छक्का प्रहार गरेका थिए । तर यी दुई खेलाडीको साझेदारी टुटेपछि नेपालका पारी एका एक कमजोर बन्यो ।

नेपालले दुई सय २४ रन बनाउदा नौ विकेट गुमायो । पुछारका खेलाडी कुशल मल्ल र रासिद खान एक एक रनमा आउट भए भने कमलसिंह ऐरीले मात्र दुई रन बनाए । नेपालका लागि आज डेब्यु गरेका हरी चौहानले अर्धसतक बनाए । उनले अविजीत ६७ रनको पारी खेले । बलिङमा युएईका रिसव मुखर्जीले चार विकेट लिए ।

नेपालले दिएको २ सय ४८ रनको लक्ष्य पक्ष्याएको युएइको स्कोर एक सय २२ रनमा तीन विकेटको अवस्थामा भारी बर्षा भएको थियो । जसका कारण खेल संभव हुन सकेन । त्यसअघि यूएईले ५ रन हुँदा हुदा पहिलो विकेट गुमाएको थियो भने २१ रन हुँदा दोस्रो विकेट झर्यो ।

तर तेस्रो विकेटका लागि कप्तान अन्स तन्डोन र भ्रित्या अरविन्दले दरिलो साझेदारी गर्दा नेपाललाई राम्रो चुनौती पस्किए। टिम दबाबमा रहेका बेला यी दुई खेलाडीले शतकीय साझेदारी गर्दै टिमको पारी राम्रोसँग सम्हाले ।

जसमा कप्तान अरविन्दले अर्धशतक प्रहार गरे । तर यूएईको स्कोर एक सय २२ रन हुँदा नेपालले यो साझेदारी तोड्न सफल भयो । उसका अन्स टण्डनलाई सागर ढकालले ५४ रनमा आउट गरे । त्यसपछि वर्षा भएपछि खेलको नतिजा डकवर्थ एण्ड लुइसको नियमका आधारमा निकालिएको थियो ।

जसमा यूएईले जितका लागि एक सय २१ रनको नयाँ लक्ष्य पाएको थियो । तर यूएईले एक सय २२ रन बनाइसकेकाले नेपाल एक रनले पराजित भयो । जितसँगै यूएई दुई खेलमा चार अंक बनाउदै अंकतालिकाको शीर्ष स्थानमा छ ।

कमेन्ट गर्नुहोस्

%d bloggers like this: