प्रवासीद्वारा विद्यालयलाई पाँच लाख सहयोग

बेनी, वैशाख ११ । म्याग्दीको अन्नपूर्ण गाउँपालिका–८ राम्चेमा रहेको देउराली आधारभूत विद्यालयलाई प्रवासी एक परिवारले रु पाँच लाख आर्थिक सहयोग गरेका छन् ।

विद्यालयमा कम्प्युटर कक्षाका लागि आवश्यक पूर्वाधार व्यवस्थापन गर्नका लागि राम्चे घर भई हाल बेलायतमा रहनुभएका स्व मोहनबहादुर पुर्जाका श्रीमती र भाइहरूले मङ्गलबार विद्यालय व्यवस्थापन समितिका अध्यक्ष राजु गर्बुजालाई रकम हस्तान्तरण गरे ।

दिवङ्गत मातापिताको स्मृतिमा मोहनबहादुरकी श्रीमती कृष्णकुमारी, भाइ डिलबहादुर, छकबहादुर, गमबहादुर र बहादुर पुर्जाका परिवारको तर्फबाट संयुक्त रु पाँच लाख सहयोग प्राप्त भएको हो । पुर्जा परिवारले कम्प्युटर कोठा बनाउन रकम अपुग भएमा थप सहयोग गर्ने प्रतिबद्धता पनि जनाएको व्यवस्थापन समितिका उपाध्यक्ष फासबहादुर गर्बुजाले बताए ।

याे पनि पढ्नुस  विद्यालयलाई एकै परिवारबाट तीस लाखभन्दा बढी सहयोग

यसैगरी राम्चे आमा समूहलाई गमबहादुर पुर्जाले रु १५ हजार, उनकी छोरी डा चुमन पुर्जाले रु पाँच हजार, बहादुर पुर्जाले रु १५ हजार र स्टाफ नर्स रेखा पुर्जाले रु पाँच हजार सहयोग गरेका छन् । सहयोगदाता पुर्जा परिवारलाई मङ्गलबार राम्चेमा देउराली आधारभूत विद्यालय, राम्चे आमा समूहले सम्मान गरेका थिए ।

सामुदायिक विद्यालयमा प्रवेश परीक्षाबाट विद्यार्थी भर्ना

म्याग्दीको बेनी सामुदायिक विद्यालयले प्रवेश परीक्षामार्फत छनोट गरेर विद्यार्थी भर्ना गरेको छ । विद्यार्थी केन्द्रित, प्रविधिको प्रयोग र बालमैत्री शिक्षण विधि तथा उत्कृष्ट नतिजाका कारण अभिभावक र विद्यार्थीको बेनी सामुदायिकमा भर्ना हुन आकर्षण बढेको हो । निजी विद्यालयका विद्यार्थीसमेत भर्ना हुनका लागि आएका छन् ।

याे पनि पढ्नुस  सडकको लालपूर्जा व्यक्तिको नाममा

नयाँ शैक्षिकसत्रमा २५१ विद्यार्थीले बेनी सामुदायिकमा भर्ना हुनका लागि सोमबार प्रवेश परीक्षामा सहभागी भएका थिए । जसमध्ये अधिकांश निजी विद्यालयका थिए । प्रवेश परीक्षामा बढी अङ्क ल्याएको आधारमा ११२ विद्यार्थीलाई मङ्गलबार भर्ना गरेको प्रधानाध्यापक दीपक श्रेष्ठले बताए ।

पूर्वाधार र जनशक्ति अभावले विद्यार्थीको चाप थेग्न नसकेपछि निश्चित सङ्ख्यामा भर्ना गर्नका लागि प्रवेश परीक्षा लिनुपरेको प्रअ श्रेष्ठले बताए । उनका अनुसार प्रवेश परीक्षामार्फत १ देखि ९ कक्षामा विद्यार्थी भर्ना गरिएको हो । वि.सं २०७० को एसएलसी परीक्षाको नतिजाको आधारमा सामुदायिकतर्फ नेपालकै उत्कृष्ट भएको बेनी सामुदायिकले अपनाएको बालमैत्री र प्रविधिमैत्री शिक्षण विधि अपनाएको छ । केही वर्षयता यस विद्यालयमा एसइईमा सहभागी विद्यार्थीको नतिजा राम्रो छ ।

याे पनि पढ्नुस  म्याग्दीमा ११ घर पहिरोको जोखिममा

कम शुल्कमा निजी स्कूलको भन्दा राम्रो शिक्षा, भविष्यमा उच्च शिक्षा अध्ययनका लागि सरकारले दिने छात्रवृत्तिलगायतका अवसर पाइने भएकाले बालबालिका भर्ना गर्न ल्याएको अभिभावक बिष्णु कँडेलले बताए । रासस

कमेन्ट गर्नुहोस्