नवगठित समाजवादी पार्टीका दुई दर्जन असन्तुष्ट समूहको छुट्टै भेला

काठमाडौं, वैशाख २५ । नवगठित समाजवादी पार्टीका असन्तुष्ट समूहले बुधबार छुट्टै भेला गरेका छन् । बाबुराम भट्टराईले पार्टीभित्र छलफलै नगरी संघीय समाजवादी फोरमसँग एकीकरण गरिएको भन्दै तत्कालीन नयाँ शक्तिका सचिवालय सदस्य र केन्द्रीय नेताहरुले छुट्टै भेला गरेका हुन् ।

भेलामा करिब दुई दर्जन नेताहरु सहभागी भएका नेता रामरिझन यादवले जानकारी दिए । भेलाले आफ्नो समूहको असन्तुष्टिबारे नवगठित समाजवादी पार्टीका संघीय परिषद् अध्यक्ष बाबुराम भट्टराईलाई ज्ञापन पत्र बुझाउने निष्कर्ष निकालिएको नेता यादवले बताए।

उनले पार्टी एकीकरणप्रति आफूहरुको समर्थन रहेको जिकिर गर्दै प्रक्रिया नमिलेकोले विरोध गरिएको बताए। असन्तुष्ट समूहमा मदन राई, कल्पना धमला, देवेन्द्र पराजुली, भक्तबहादुर शाह, ज्ञानेन्द्रकुमाल लगायत छन्। तत्कालीन नयाँ शक्ति पार्टीको विज्ञ परिषद्का सदस्य मदन राईको निवास ललितपुर ढोलाहिटीमा उनीहरुले आगामी रणनीतिबारे पनि छलफल गरेका छन् ।

कमेन्ट गर्नुहोस्