वर्षैभरि निरन्तरता दिने गरी कुश्मामा बुद्ध जयन्तीको अवसरमा वृक्षारोपणको शुभारम्भ

कुश्मा, जेठ १० । बुद्ध जयन्तीको अवसरमा वर्षैभरि निरन्तरता दिने योजनानुरुप कुश्मा नगरपालिकाको ७ नं. वडाको अग्लो पुल टोलबाट कुश्मा नगरपालिकाका मेयर रामचन्द्र जोशीको प्रमुख आतिथ्यतामा वृक्षारोपण कार्यक्रमको शुभारम्भ गरिएको छ ।

एउटा सडकको दुबैतर्फ धुपी वृक्षारोपण गरी सो सडकलाई धुपी मार्ग र अर्को सडकको दुवैतर्फ अशोक वृक्षारोपण गरी सो सडकलाई अशोक मार्ग नामाकरण गरिएको छ । छ मिटर चौढाइको यी दुई मार्गको लम्बाइ करीब ५०० मिटरको छ ।

वृक्षारोपणको शुभारम्भ गर्नुअघि मन्तब्य दिने क्रममा कुश्मा नगरपालिकाका मेयर रामचन्द्र जोशीले वृक्षारोपण गरिएका बिरुवाहरुलाई राम्ररी हुर्काउन यथोचित रेखदेख गर्ने कामलाई उच्च महत्व दिनुपर्ने कुरामा जोड दिए ।

मेयर जोशीले कुश्मा नगरपालिकाले आयोजना गरेको वृक्षारोपणको अवधारणाले अरुलाई पनि प्रोत्साहित गर्न सक्ने विश्वास ब्यक्त गरे ।

लुम्विनी–कपिलवस्तु विश्व अभियानका विस्व संयोजक एबं अस्ट्रेलिया सरकारका तर्फबाट वरिष्ठ स्टक्चरल इन्जिनियर रामकुमार श्रेष्ठले वृक्षारोपणको धार्मिक, पर्यावरणीय, आर्थिक, प्राकृतिक प्रकोप न्यूनिकरण जस्ता बहुआयामिक महत्व भएको र हामीले फेर्ने स्वास बोट बिरुवाले लिने र बोट बिरुवाले फाल्ने स्वास हामीले लिने भएकोले प्रत्येक बोट बिरुवासंग हाम्रो आधा जीवन जोडिने भएकोले पनि वृक्षारोपणको महत्व अत्यन्तै ठूलो हुने बताए ।

यो वर्ष २५६३औं बुद्ध जयन्ती हो, तर यो वुद्धले महापरिनिर्माण लिएका आधारमा मनाइने गरिएको हो । वुद्धको जन्मस्थल बिषयमा विश्वव्यापी दिग्भ्रम सिर्जना भएका कारण अभियानले विगत केही वर्षदेखि बुद्धको जन्मस्थल नेपाल भएकोले बुद्ध जन्मेको वर्षलाई आधार मानी वुद्ध जयन्ती मनाउन आग्रह गर्दै आएकोले यो बर्षको वुद्ध जयन्ती २६४३ औं हुने जानकारी दिए । जयन्ती भन्ने बित्तिक्कै जन्मकै आधारमा मनाउने विश्वव्यापी प्रचलन भएकोले पनि यो अवधारणा सही भएको जिकिर श्रेष्ठले गरे ।

मन्तब्यकै क्रममा श्रेष्ठले युनेस्कोको आर्थिक सहयोगमा प्रो कनिंघामको नेतृत्वमा लुम्बिनी क्षेत्रमा गरिएको अत्याधुनिक उत्खननले बुद्ध जुन समयमा जन्मेको भनी मानी आएको छ त्योभन्दा केही सय वर्ष अघि नै जन्मनु भएको भन्ने निकालेको अनुसन्धानात्मक निचोडलाई थुप्रै अन्तराष्ट्रिय संचार जगतले उच्च प्राथमिकता दिएको र न्यासनल जियोग्राफी जस्तो संस्थाले त यो बिषयमा डकुमेण्ट्री नै बनाउँदा नेपाली सरकार र संचार जगतले यस्लाई खासै महत्व नदिएको कारण यत्ति महत्वपूर्ण जानकारीबाट अधिकांश नेपाली अनभिज्ञ रहेको गुनासो पोखे ।

कार्यक्रमका अध्यक्षता गरेका कुश्मा नगरपालिकाको वडा नं. ७ का अध्यक्ष सुभाश चन्द्र पौडेलले बुद्ध जयन्तीको अवसरमा नगरपालिकाभित्र बर्षैभरी निरन्तरता दिइने वृक्षारोपण कार्यक्रमको शुभारम्भलाई भब्य रुपमा सफल तुल्याउन योगदान दिने सबैप्रति आभार प्रकट गरे ।

कुश्मा नगरपालिकाका कर्मचारी लालप्रसाद पाध्याले सन्चालन गरेको उक्त कार्यक्रममा नगरपालिकाका उपप्रमुख सीताकुमारी काप्ले लामिछाने, नगरपालिकाका प्रमुख प्रशासकीय अधिकृत हरि पंगेनी, नगरपालिकाका पूर्व प्रमुख प्रशासकीय अधिकृत सुवाश कुमार लामिछाने, १४ वडाका वडा अध्यक्षहरु, कार्य समितिका सदस्यहरु, अस्ट्रेलियन स्वयं सेवकहरु,कुश्मा नगरपालिकाका बिभिन्न शाखा प्रमुखहरु, पत्रकारहरु आदिको सहभागिता थियो ।

कमेन्ट गर्नुहोस्