२७ गीति एल्वम तथा २ पुस्तक एकैसाथ

काठमाडौं, जेठ १९ । सम्भवत विश्वकै इतिहासमा नयाँ रेकर्ड कायम राख्दै वरिष्ठ गीतकार बीबी थापाको एकैसाथ २७ गीति एल्वम लोकार्पण गरिएको छ ।

नेपालका प्रथम उपराष्ट्रपति परमानन्द झाले २७ गीति एल्वम एवं दुई पुस्तकको लोकार्पण गरेका हुन् । छायाँछवि क्रियशनको आयोजनामा सम्पन्न यस लोकार्पण कार्यक्रममा वरिष्ठ चलचित्र निर्देशक एवं साहित्यकार यादव खरेल, वरिष्ठ संगीतकार शक्ति बल्लभ, बरिष्ठ गीतकार दिनेश अधिकारी, वरिष्ठ गायक प्रकाश श्रेष्ठ, वरिष्ठ गीतकार रत्नशमशेर थापा, गीतकार संघका अध्यक्ष चुणामणी देवकोटा, वरिष्ठ गायक जगतमर्दन थापा, प्राध्यापक डा. हेमनाथ पौडेल विशिष्ठ अतिथिका रुपमा थिए ।

कार्यक्रममा स्वागत मन्तव्य राख्दै वरिष्ठ पत्रकार एवं छायाँछविका अध्यक्ष शान्तिप्रियले नेपाली संगीतकै इतिहासमा एकैसाथ २७ गीति एल्वम एवं दुई पुस्तक लोकार्पण हुनु गौरवान्वित विषय भएको बताए । प्रियले एकै गीत निकालेर त्यसैको म्यूजिक भिडियो बनाई युट्युब भ्यूअर्स गन्ने बर्तमान समयमा २७ एल्वम प्रकाशित गर्नु सबैका लागी चुनौति भएको बताए । कार्यक्रममा गीति एल्वमका श्रष्टा बीबी थापाले आफूले गरेको मेहनत सार्थक चभएको बताए ।

कसैलाई कुनै चुनौति दिनुभन्दा पनि आफ्नो प्रयास नेपाली संगीतको विकासमा कुनै एक इट्टा बन्न सकेमा त्यो नै उपलब्धि हुने बताए । कार्यक्रममा बोल्दै प्रमुख अतिथि नेपालका प्रथम उपराष्ट्रपति परमानन्द झाले गौरवपूर्ण यस किसिमको कार्यक्रममा हिस्सा बन्न पाएकोमा खुसी लागेको बताए ।

विश्वमै विरलै भेटिन सकिने यस्तो गतिविधी गीनिज बुक अफ वल्ड रेकर्डस्मा दर्ता हुनु पर्ने बताए । बी.बी. थापाले नेपाली संगीतलाई ठूलो गुन लगाएको समेत प्रथम उपराष्ट्रपति झाले जिकीर गरे । कार्यक्रममा दील एक धड्कन अनेक गजल संग्रह तथा आशक्ति गीत संग्रहको लोकार्पण गरिएको थियो ।

यस्तै कार्यक्रममा लोकार्पण गरिएका २७ एल्वमहरुमा १. २४ क्यारेट, २. ओण्डरफूल ड्रिम, ३. लभ गुरु, ४. मायाको डुंगा, ५. मान्छे, ६. कबूल, ७. दिलवाली, ८. एक जमानापछि, ९. सुर संगम, १०. टाढा, ११. मोहिनी, १२. प्रेम पुजारी, १३. घुम्टो, १४. मेरो हजुर, १५. क्लासिक हिट्स्, १६. नशा मिलाएर पानी, १७. नशा रमरौस, १८. नशा मायाको बिर्को, १९. ओ सेरी, २०. क्रेजी लभर, २१. गागलफेदी, २२. अगेन इन लभ, २३. प्रेमनगर, २४. म को हँु, २५. प्रेमवर्ष, २६. प्रभु पद, र २७. अन्तिम यात्रा रहेको थियो ।

जसमा १४५ गीतहरु समावेश रहेका छन् । गीतलाई बीबी थापा इन्टरटेनमेन्टले प्रकाशन गरेको हो । कार्यक्रममा विभिन्न ५ गीतहरुका भिडियो देखाइएको थियो । जीवन रसाइली, सुब्रत आचार्य एवं हेम प्रभाषले निर्देशन गरेको भिडियोमा गम्भीर विष्ट, प्रदिप बास्तोला, एलिशा राई, श्रीदेव भट्टराई, अनामिका चौलागाई, जेवीका कार्की आदि फिचरिङ थिए ।

कार्यक्रममा एल्वममा समावेश भएका गीत संगीतका विभिन्न श्रष्टाहरुलाई आभार पत्र एवं सम्मान प्रदान गरिएको थियो भने कार्यक्रम संचालन वरिष्ठ संचारकर्मी दिनेश डी.सीले गरेका थिए ।

कमेन्ट गर्नुहोस्