ओखलढुंगामा बाढीपहिरोबाट चारको मृत्यु

ओखलढुंगा, असार २९ । सडकका कारण ओखलढुंगामा दुई जनाले ज्यान गुमाएका छन् ।

मोलुङ गाउँपालिका वडा नं. ७ पात्लेमा शनिबार बिहान पहिरो जाँदा एकै परिवारका दुई जनाको ज्यान गएको हो । पहिरोमा परी मृत्यु हुनेमा मोलुङ गाउँपालिका वडा नं. ७ की ४० वर्षीय खपुटी शेर्पा र उनकी १२ वर्षिय छोरी याङजी शेर्पा रहेको प्रहरीले जनाएको छ ।

चार दिनदेखि परेको अविरल वर्षाका कारण शुक्रवार चिसंखुगढी गाउँपालिकाको स्थानीय लसुनेखोलाले बगाउँदा शुक्रबार एकजनाको मृत्यु भएको थियो भने शनिबार बिहान मोलुङ गाउँपालिका ७ पात्लेमा घरमा बसिरहेको अवस्थामा पहिरोमा परी दुई जनाको मृत्यु भएको छ ।

जिल्ला प्रहरी कार्यलय ओखलढुंगाका अनुसार चिसंखुगढी गाउँपालिका ४ नवलपुरका ८५ वर्षीय बृद्धा पासाङकुटी शेर्पाको शुक्रबार र शनिबार मोलुङ गाउँपालिका वडा नं.७ की ४० वर्षीय खपुटी शेर्पा र उनकी १२ वर्षिय याङ्जी शेपाको घटना स्थलमै मृत्यु भएको जिल्ला प्रहरी कार्यालय ओखलढुंगाका प्रहरी निरीक्षक राजिव श्रेष्ठले बताए ।

त्यस्तैगरी मोलुङ खोलामा आएको बाढीले बगाएर गम्भीर घाईते भएका सुनकोसी गाउँपालिका ४ चिउरीबोटका ५५ वर्षीय कुमार राईको पनि मृत्यु भएको स्थानियले बताएका छन् ।

घरमाथि खनिएको सडकका कारण पहिरो जाँदा आमाछोरीको ज्यान गएको वडा अध्यक्ष हेम सुनुवारको भनाई छ ।उनीहरुलाई आफुहरुले जोखिम बढ्दै गएका कारण अन्यत्र सर्न आग्रह गरेपनि अटेर गरी सोही घरमा बसेका कारण दुखद घटना भएको सुनुवारले बताए । गोरखापत्रदैनिकबाट

कमेन्ट गर्नुहोस्