विप्लव समूहद्वारा सरकारी गाडी गुड्न नदिने घोषणा, वार्ताको हल्ला नाटक मात्रै भएको प्रतिक्रिया

काठमाडौं, साउन २ । नेत्रबिक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) ले सरकारी गाडी सडकमा गुड्न प्रतिबन्ध लगाउने निर्णय गरेको छ । सरकारले विप्लव समूहसँग वार्ताका लागि प्रयास गरिहेको समाचार सार्वजनिक भइरहेको बेला उक्त पार्टीका मध्य पश्चिम कमाण्डले भने सरकारी गाडी गुड्न प्रतिबन्ध लगाउने निर्णय गरेका हुन् । मध्यपश्चिम कमाण्डका इन्चार्ज वीरजंगले बुधबार विज्ञप्ति जारी गरेर साउन ७ गतेदेखि सेतो नम्बर प्लेट (सरकारी) सम्पूर्ण गाडीहरु सडकमा गुड्न प्रतिबन्ध लगाउने घोषणा गरेका छन् ।

विज्ञप्तीमा भनिएको छ, ‘हाम्रो पार्टी नेपाल कम्युनिस्ट पार्टी एकीकृत जनक्रान्तिको वैज्ञानिक कार्यदिशाको सफल कार्यान्वयनका साथ अगाडि बढिरहेको छ । यस प्रक्रियामा प्रतिक्रियावादी सत्ता र जनसत्ता बीचको मोर्चाबन्दी झन् कसिलो बन्दै गइरहेको छ । राजनीतिक लडाइँको मोर्चामा हारेको विरोधी सत्ताले हाम्रा नेता कार्यकर्ताहरुलाई गैरन्यायिक गिरफ्तारी, दमन, यातना तथा हत्यासम्मका घटनाहरु घटाएको छ । यसरी हत्या आतङ्क, गिरफ्तारी, दमन र बलात्कारसम्मले पनि आन्दोलनलाई ठेगान लगाउन नसकेपछि बार्ताको भ्रमपूर्ण बकवास गोयबल्स शैलीमा फैलाएको छ र थप दमनको तयारी गरिरहेको छ ।” विज्ञप्तिमा भनिएको छ । जनताबाट कर असुल्ने, जनप्रतिनिधि नै ठेक्कापट्टामा लागेको आफ्नै टिप्पर, ट्रक, ट्याक्टर र स्काभेटर प्रयोग गरेर राज्यको सम्पति दोहन गरेको भन्दै विज्ञप्तिमा सररकारी गाडीलाई प्रतिबन्ध लगाइएको बताइएको छ ।

याे पनि पढ्नुस  विप्लव समूहका नेता लोहनी चितवनबाट पक्राउ

कतिपय कथित जनप्रतिनिधि नै जनहत्यारा अभियानमा सुराकीको भूमिका खेलिरहेको भन्दै आगामी दिनमा ती सबै हर्कतहरु बन्द गर्ने निर्णय गरेको विज्ञप्तिमा उल्लेख छ । पार्टीलाई प्रतिबन्ध लगाउने, नेता कार्यकर्ता हत्या गर्ने, हिरासतमा राखि यातना दिने तथा शान्तिपूर्ण भेला सम्मेलनहरु गर्न नदिने राज्यको कदमका विरुद्ध आगामी २०७६ साउन ७ गतेदेखि सेतो नम्बर प्लेटका सम्पूर्ण गाडीहरु सडकमा गुड्न प्रतिबन्ध गरिएको बताइएको छ ।

याे पनि पढ्नुस  डोल्पामा २ लाख खर्चेर तुइनबाट तारियो सरकारी गाडी

इन्चार्ज विरजंगले विज्ञप्तिमा भनेका छन्, ‘यता जनताको गाउँ–गाउँमा सिंहदरवारको नारामा गठित कथित सरकारद्वारा चर्को कर असुल्ने र जनतामाथि नै दमन अभियान संचालन गरेर जनपक्षीय आवाजहरुलाई बन्द गर्ने, उता कथित जनप्रतिनिधिहरु नै ठेक्का पट्टामा सामेल हुने, आफ्नै टिप्पर, ट्रक, ट्याक्टर र स्काभेटर प्रयोग गर्दै राज्यको सम्पत्ति दोहन गरिरहेका छन् । साथै कतिपय कथिन जनप्रतिनिधिहरु नै जनहत्यारा अभियानमा सुराकीको भूमिका खेलिरहेको हुनाले हाम्रो पार्टीले आगामी दिनमा ती सबै हर्कतहरु बन्द गर्ने निर्णय गरेको छ ।

मुक्तिकामी श्रमजीवी जनताको पार्टीलाई प्रतिबन्ध लगाउने, नेता कार्यकर्ता हत्या गर्ने, हिरासतमा राखि यातना दिने तथा शान्तिपूर्ण भेला सम्मेलनहरु गर्न नदिने राज्यको कदमका विरुद्ध आगामी २०७६ साउन ७ गतेदेखि सेतो नम्बर प्लेटका सम्पूर्ण गाडीहरु सडकमा गुड्न प्रतिबन्ध गरिएको छ । उक्त निर्णयका विरुद्ध जनविरोधी कार्य गरे र गराएमा जनताले नियन्त्रणमा लिई कारवाही चलाउने कुरा जानकारी गराउँदै पार्टीका सम्पूर्ण नेता कार्यकर्ताहरु सोही निर्णय अनुसार अगाडी बढ्नसमेत यो वक्तव्य मार्फत् जानकारी गराउँदछौं ।”

याे पनि पढ्नुस  डा. गोविन्द केसीद्वारा बिरामीलाई सरकारी गाडीमा अस्पताल ल्याउने व्यवस्था गर्न माग

यस्तै नेकपाले अरबौ करछली गर्दै आएको एनसेलबिरुद्धको ‘नो ट्याक्स, नो एनसेल’ अभियानलाई शशक्तरुपमा अगाडि बढाएको छ । बुधबार मात्रै नेकपा सेती( महाकाली ब्युरोले सुदूरपश्चिमका ९ वटै जिल्लामा एनसेलका रिचार्ज कार्ड र सीम कार्ड जलाएको छ । साथै राज्यलाई अरबौं कर नतिर्ने र उपभोक्तालाई ठग्ने एनसेल बहिस्कार गर्न र सीम प्रयोग नगर्न पनि नेकपाले आम जनतालाई अपिल पनि गरेको छ । बुधबार नेकपाले सुदूरपश्चिमका कैलाली र कंचनपुरसहित डडेलधुरा, बैतडी, दार्चुला, डोटी, अछाम, बझाङ र बाजुरामा एक साथ सीमकार्ड र रिचार्ज कार्ड जलाएको थियो ।

कमेन्ट गर्नुहोस्