ईमरान खानका कडा कुरा: भारतले परमाणु हतियार त्यागाेस्, पाकिस्तान तयार छ

काठमाडौँ, साउन ७ । अमेरिका भ्रमणमा रहेका पाकिस्तानका प्रधानमन्त्री इमरान खानले आफ्नो देशले परमाणु हतियार परित्याग गर्न तयार रहेको बताएका छन् । तर उनले त्यसका निम्ति भारतले उक्त कदम चालेको हुनुपर्ने शर्त राखेका छन् ।

फक्स न्युजका पत्रकार ब्रेट बेयरलाई दिएको एउटा अन्तर्वार्तामा खानले परमाणु युद्ध कुनै विकल्प नभएको भन्दै भारत र पाकिस्तानबीच रहेको करिब अढाई हजार माइल लामो सीमा रहेको पृष्ठभूमिमा यस्तो परिस्थितिमा पुग्नु भनेको आफैंलाई ध्वस्त पार्नु हुने बताए ।

खानले अमेरिका विश्वकै सर्वाधिक शक्तिशाली देश भएकाले उसले मात्र कस्मीर मामिलामा भारत र पाकिस्तानबीच मध्यस्थता गर्न सक्ने बताए ।

उनले भारत र पाकिस्तानबीच प्रमुख विवादको रूपमा रहेको कश्मीर मुद्दाकै कारण दुई देश ७० वर्षदेखि छिमेकीको रूपमा बस्न नसकेको बताए ।

सोमवार मात्रै प्रधानमन्त्री खानसँगको संयुक्त पत्रकार सम्मेलनमा अमेरिकी राष्ट्रपति ट्रम्पले आफूले कश्मिर मामिलामा मध्यस्थकर्ताको भूमिका खेल्नसक्ने बयान दिएपछि यस विषयमा भारतको प्रतिक्रिया आइसकेको छ ।

भारतले कस्मीर समस्यामा तेस्रो पक्षको आवश्यकता नरहेको प्रतिक्रिया दिएको छ ।

यस विषयमा बोल्दै प्रधानमन्त्री खानले भनेका छन्, “पहिले भारतवार्ताका लागि तयार त् होस् ।”

लामो समयदेखि दक्षिण एसियामा अमेरिकाको प्रमुख रणनैतिक साझेदार रहेको पाकिस्तानसँग अमेरिकाको सम्बन्ध ट्रम्प सत्तामा आएपछि बदलिएको थियो ।

गतवर्ष मात्रै ट्रम्पले अमेरिकाले पाकिस्तानलाई उपलब्ध गराउंदै आएको नियमित सैन्य तथा आर्थिक सहयोग बन्द गरिदिएको थियो ।

इमरानले आतंकवादबाट सबैभन्दा बढी पीडित देश पाकिस्तान भएको बताएका थिए ।

कमेन्ट गर्नुहोस्