अस्थायी शिक्षकको फैसला २४ गतेलाई सर्‍यो

काठमाडौं । शिक्षा ऐनको आठौं र नवौं संशोधन खारेजीको मागराख्दै सर्वोच्च अदालतको संवैधानिक इजलाशमा दायर मुद्दाको बुधवार हुने भनिएको फैसला साउन २४ गतेलाई सरेको छ । गत जेठ २९ गते मुद्दामा अन्तिम बहस भएको थियो । त्यतिबेला मुद्दाको अन्तिम फैसला असार १८ गते आउने जनाइएको थियो । पछि पुन साउन १५ का लागि सारिएको थियो ।

असार १८ गते सर्वोच्च अदालतको संवैधानिक इजलाशले अन्तिम फैसला सुनाउन अघि दुवैपक्षका अधिवक्ताहरुसँग बहस नोट माग गरेको थियो । दुबैपक्षलाई साउन १० गतेभित्र बहस नोट दिन भनिएको थियो ।

याे पनि पढ्नुस  सिन्धुलीमा १५ वर्षीय बालकलाई जन्मकैद

अस्थायी शिक्षकहरुका तर्फबाट बहस गरेका अधिवक्ताहरुले १० गतेभित्रै बहस नोट पेश गरेको भएपनि विपक्षीमध्येका उपभोक्ता अधिकार मञ्चका ज्योति बानियाले साउन १४ गते मात्रै बहस नोट बुझाएकाले १५ गतेलाई तय फैसला २४ गतेलाई सरेको हो ।

बानियाले अस्थायी शिक्षकहरुले नेपालको शिक्षा ध्वस्त बनाएकाले उनीहरुलाई कुनै हालतमा स्थायी गर्न र सुविधा दिन नहुने भन्दै मुद्दा दायर गरेका थिए । साथै उनी अस्थायी शिक्षकको मुद्दाको विपक्षमा बहस गर्दै आएका छन् । उनै वानियाले ढिलो गरी बहस नोट अदालतमा पेश गरेकाले बुधवारको फैसला सरेको हो ।

याे पनि पढ्नुस  अस्थायी शिक्षकले आमरण अनशन बस्ने

शिक्षा ऐनको विभिन्न व्यवस्थाहरु खारेज गर्नुपर्ने र शिक्षक सेवा आयोगले सञ्चालन गरेको अस्थायी शिक्षकहरुको विज्ञापनसमेत खारेजी गर्न सक्ने महत्वपूर्ण फैसला गर्नुपरेकाले इजलाशले पहिले बहस नोट अध्ययन गर्न खोजेको थियो ।

अस्थायी शिक्षकका सम्बन्धमा यसअघिको सर्वोच्च अदालतको परमादेश कार्यान्वयन गर्न साथै संविधानसँग बाझिएका शिक्षा ऐन, शिक्षक सेवा आयोगको नियमावलीको व्यवस्था खारेज गर्न माग गर्दै अस्थायी शिक्षकहरुले संवैधानिक इजलाशमा मुद्दा दर्ता गराएका थिए ।

जेठ २९ गते भएको बहसमा अस्थायी शिक्षकका तर्फबाट दायर १३ वटा मुद्दाको पक्षमा अधिवक्ता शान्ता पन्त, डण्डपाणी पौडेल, रामचन्द्र श्रेष्ठले बहस गरेका थिए भने सरकारका तर्फबाट सह–महाधिवक्ता रेवतीरमण त्रिपाठीले गरेका थिए । अधिवक्ता पौडेलले अस्थायी शिक्षकका २ मुद्दामा बहस गरेका थिए भने पन्त र श्रेष्ठले बाँकी ११ मुद्दामा बहस गरेका थिए ।

याे पनि पढ्नुस  रविकाे अर्काे पेशी असाेज ५ गते, प्राविधिकलाई पनि बकपत्रका लागि बाेलाइयाे

प्रधानन्यायधीन चोलेन्द्र शम्शेर जवरा, न्यायधीशहरु मिरा खड्का, हरिकृष्ण कार्की, दिपककुमार कार्की, केदारप्रसालद चालिसकोे पूर्ण इजलाशले दुवै तर्फको बहस सुनी असार १८ गते निर्णय सुनाउने जनाएको भएपपनि पुन सारेर साउन १५ गते सुनाउने जनाएका थिए । इजलाशले बुधवार सूचना जारी गरेर बहस २४ गतेलाई सरेको जानकारी दिएको हो । Educationpati बाट साभार

कमेन्ट गर्नुहोस्