संविधान संशोधनको औचित्यमाथि सञ्चारमन्त्रीको प्रश्न, प्रदेश २ सरकारको आलोचना

जनकपुर । सरकारका प्रवक्ता एवं सञ्चार तथा सूचना प्रविधिमन्त्री गोकुल बाँस्कोटाले प्रदेश नं. २ ले आफ्नो जिम्मेवारी बहन गर्नुभन्दा अनावश्यकरुपमा एक कदम अघि बढन खोजेको बताएका छन् ।

आज जनकपुरमा पत्रकारहरुसँग कुरा गर्दै बास्कोटाले संविधान संसोधनको आवश्यकता र औचित्य पुष्टि भएमा मात्रै संशोधन गर्न सकिने समेत बताए ।

“वर्तमान संविधान अहिलेसम्मकै उत्कृष्ट रहेको छ ।” उनले भने, “त्यसलाई आवश्यकता र औचित्यको आधारमा संशोधन गरिने छ ।”

मधेसवादी दलहरुले भने मधेसका मुद्दा नसमेटिएको भन्दै संविधान घोषणा भएदेखि नै बिरोध गर्दै आएका छन् ।

मन्त्री बास्कोटाले संविधान कार्यान्वयनतर्फ लाग्न सुझाव समेत दिए । तीन तहकै सरकारले आ–आफ्ना जिम्मेवारी कुशलतापूर्वक सम्पन्न गर्नुपर्ने बताउँदै मन्त्री बाँस्कोटाले प्रदेश २ सरकार जिम्मेवारी छाडेर एक कदम अगाडि बढ्न खोजेको आरोप लगाए ।

याे पनि पढ्नुस  मिडिया काउन्सिल विधेयकः दण्ड, सजाय र जरिवाना अदालतले तोक्ने

सञ्चारमन्त्री बांस्कोटाले विकास नै प्रमुख प्राथमिकतामा भएकाले बजेटको समयमै सदुपयोग गर्नुपर्नेमा जोड दिए ।

उनले प्रदेश २ मा नेपाल रेल्वे, निजगढ अन्तर्राष्ट्रिय विमानस्थल,मदन भण्डारी राजमार्ग,कोशी करिडोर, नारायणी करिडोरलगायतका परियोजनाहरु सञ्चालनमा ल्याएको जानकारी दिए ।

सरकारका मन्त्रीहरुले गर्ने कामको मूल्यांकन पनि स्वयं नेपाली जनताले नै गर्ने उनको भनाइ थियो ।

सरकारका प्रवक्तासमेत रहेका मन्त्री बाँस्कोटाले नेपाली प्रेसलाई विश्वसनीय बनाउन नियमनको अवधारणा अघि सारेको र नियमनका क्रममा तानाशाही नभई लोकतान्त्रिक प्रक्रियालाई आत्मसात् गरिनेछ भन्नुभयो ।

उहाँले मिडिया काउन्सिल विधेयक अवश्य आउँछ भन्दै भ्रमको खेती गरी अब नेपाली पत्रकारिताले फड्को मार्न नसक्ने स्थितिको बोध सबैले गर्नु जरुरी भएकातर्फ ध्यानाकर्षण गराउनुभयो ।

याे पनि पढ्नुस  अडियाे काण्डबारे मन्त्री बाँस्काेटाकाे प्रतिक्रिया: काठमाडाैं पुगेर सबै कुरा भन्छु

सरकार पत्रकारको हितका लागि सधैँ अग्रसर भएको उल्लेख गर्दै उहाँले भन्नुभयो, “पुरानो तरिकाले पत्रकारिता मौलाउन सक्दैन, पत्रकारले आफँै सुधार गर्नुपर्दछ ।”

मन्त्री बाँस्कोटाले सङ्घीय सरकारले प्रदेश नं २ सँग पक्षपात नगरी न्यायप्रणालीको शुरुआत गरेको उल्लेख गर्दै सिङ्गो तराईको विकासका लागि बृहत् विकासका परियोजना कार्यान्वयन गरेको स्पष्ट गर्नुभयो ।

हिँड्दै जाने पाइला मेटिँदै जाने प्रवृत्तिबाट मुक्तिको आवश्यकतामा जोड दिँदै उहाँले राजनीतिको रोटी सेक्ने दिन गयो, अब जनतामाझ गरिएको वाचालाई साकार पार्न अग्रसर हुनुपर्दछ भन्नुभयो ।

मन्त्री बाँस्कोटाले भन्नुभयो, “अब जनताको निगरानीमा सरकार सञ्चालन भइरहेका कारण अल्झिने र अल्झाउने कसैलाई पनि छुट छैन, उपलब्धिलाई उपलब्धिका रूपमा ग्रहण गर्नुपर्दछ ।”

याे पनि पढ्नुस  लक्ष्मण थारुले भने, ‘असोज ३ गते संविधानको धारा, उपधारा जलाउँछौं’

उहाँले नेपालको मिडियाले अब राजनीति मात्र लेख्ने होइन, विकास निर्माणको अनुगमनतर्फ पनि लेखन गरी सहीको वकालत र गलतलाई उजागर गर्नु आवश्यक भएको धारणा व्यक्त गर्नुभयो ।

राष्ट्रमा निराशा होइन, उत्साहको सिर्जना हुने खोजमूलक पत्रकारिता आजको आवश्यकता हो भन्दै मन्त्री बाँस्कोटाले अब विकास, प्रगति र अग्रगति राष्ट्रिय एजेण्डालाई प्राथमिकता दिनुपर्ने खाँचो औँल्याउनुभयो ।

मन्त्री बाँस्कोटाले मिडियाले सरकारको योजना र जनताको चाहनाबीचको अवरोधलाई उजागर गरी गतिशील र तीव्रता दिने वातावरण निर्माणमा टेवा पु¥याउनु जरुरी भएको बताउनुभयो । उहाँले चुरेको डरलाग्दो दोहन रोक्न सङ्घ र प्रदेश सरकारको प्रयास आवश्यक रहेको धारणा पनि राख्नुभयो ।

पत्रकार सम्मेलन शाखाका अध्यक्ष अनिल मिश्रको अध्यक्षतामा भएको थियो ।

कमेन्ट गर्नुहोस्