कर्मचारी संचय कोषले छुट्टै आवास कम्पनी संचालन गर्दै

चितवन । कर्मचारी सञ्चय कोषले आवास योजना सञ्चालन गर्न छुट्टै कम्पनी स्थापना गर्न लागेको छ । कोषको स्वामित्वमा रहेका भवनको व्यवस्थापन तथा भविष्यमा आवास योजना सञ्चालन गर्न नयाँ कम्पनीको प्रक्रिया अघि बढाइएको संचय कोषका प्रशासक तुलसी प्रसाद गौतमले जानकारी दिए ।

‘अहिले प्रक्रिया सुरु भएको छ, नयाँ कम्पनीको विनियमावली तयार गर्ने काम अन्तिम चरणमा पुगेको छ,’ गौतमले भने, ‘अब छिट्टै नै हामी सञ्चालक समितिमा त्यसलाई लगेर अन्तिम रुप दिनेछौँ।’

नयाँ कम्पनीलाई सञ्चय कोषले व्यवसायिक प्रयोजनका लागि निर्माण गरेका भवनहरु भाडामा लगाउने, तिनीहरुको व्यवस्थापन गर्ने लगायतका अधिकार दिने तयारी भइरहेको छ।

सञ्चय कोषको स्वामित्वमा रहेका मध्ये सुन्धारामा रहेको काठमाडौं मल र ललितपुरको लगनखेलमा रहेको भवन पूर्णरुपमा भाडामा लगाइएको छ। काठमाडौंको ठमेल र ललितपुर पुल्चोकमा रहेको केन्द्रीय कार्यालय रहेको भवन आंशिकरुपमा भाडामा लगाइएको छ।

सञ्चय कोषले पहिलो चरणमा चितवनको कल्याणपुरमा रहेको आफ्नो ४ बिघा १६ कट्ठा जमिनमा आवास योजना अघि बढाउने तयारी गरेको छ। त्यसबाहेक अन्यत्र पनि आवश्यकताका आधारमा जग्गा खरिद गरी आवास योजना सञ्चालन गर्न सकिने गौतमले बताए।

‘नयाँ स्थानमा जग्गा खरिद गरी आवास परियोजना अघि बढाउन सक्ने गरी कम्पनी स्थापना हुनेछ,’ गौतमले भने, ‘यो सबैको अधिकार रहने गरी कम्पनी स्थापना हुनेछ। कम्पनीले नै सबै काम अघि बढाउनेछ।’

तीन वर्षअघि सञ्चय कोष ऐन संशोधन गर्दै कोषको क्षेत्राधिकार बढाइएको थियो। यसै संशोधनमार्फत सञ्चय कोषलाई आवास परियोजना अघि बढाउने अधिकार दिइएको थियो।

कमेन्ट गर्नुहोस्