नेपाली चेली चीनमा ‘दुलही’ का नाममा १० लाखमा बिक्री

काठमाडौंः  नेपाली चेली छिमेकी मुलुक चीनमा ‘दुलही’ का नाममा १० लाख रुपैयाँसम्म बिक्री हुने गरेको पाइएको छ । दुलही बनाएर युवती ओसारपसार गर्न सुरक्षित र सजिलो हुने भएकाले मानव तस्करहरूले यस्तो नयाँ शैली अपनाएका हुन् ।

नेपाल प्रहरीको मानव बेचबिखन तथा ओसारपसार (नियन्त्रण) ब्युरोले ‘दुलही’ बनाएर चीन लगिएका अधिकांश युवतीलाई देह व्यापारमा लगाउने गरेको दाबी गरेको छ । सो अपराधमा संलग्न रहेको अभियोगमा छ जना नेपाली र चार जना चिनियाँ नागरिक गरी १० जना पक्राउ परेका छन् ।

ब्युरो प्रहरी प्रवक्ता प्रहरी उपरीक्षक गोविन्द थपलियाले विवाहको प्रलोभन देखाइ मानव तस्करी हुने गरेको विशेष सूचनाका आधारमा विभिन्न स्थानमा छापा मारी नेपाल–चीन मानव तस्करीको एउटा सञ्जाल पक्राउ गरिएको बताए ।

पक्राउ पर्नेहरूमा सिन्धुपाल्चोक हेलम्बुकी विविरानी भन्ने रिना तामाङ, नुवाकोट ककनीका रोज तामाङ, लमजुङ बेँसीसहरकी पार्वती गुरुङ, लमजुङकै अमृता गुरुङ, भरत तामाङ र उषाकुमारी घिमिरे छन् ।

याे पनि पढ्नुस  दुलही बनाएर चीनतर्फ ‘तस्करी’

त्यस्तै चिनियाँ नागरिक झिङ साङ दोङ, झाङ दोङ हुँ, क्वुङ झाङ पेङ र क्विन लियाङ रहेका छन् । चीनको हुवीका स्थायी बासिन्दा झिङ र झाङ काठमाडौँमा नै बसेर चीनबाट विवाह गर्न युवा बोलाउने दलाल रहेको जानकारी ब्युरो प्रहरीले दिएको छ । अभियुक्त क्युङ र क्विन विवाह गर्न भनेर केही दिनअघि नेपाल आएका हुन् ।

नेपाली महिला रिना भाषा अनुवादक तथा दलाल, रोज कागजपत्र बनाउन सहयोगी, पार्वती, अमृता, भरत र उषा ग्रामीण क्षेत्रबाट युवती फकाइफुलाई काठमाडौँसम्म ल्याउने कार्यमा संलग्न रहेको जानकारी ब्युरो प्रहरीले दिएको छ ।

सो समूहको कब्जामा रहेका चार जना पीडित युवतीको उद्धार गरिएको छ । ब्युरो प्रवक्ता थपलियाका अनुसार विवाह गराइदिएबापत चिनियाँले प्रतिव्यक्ति १० लाख रुपैयाँ दिने जनाइएको छ । पक्राउ अभियुक्तहरूको साथबाट २१ लाख ९७ हजार रुपियाँ, ३८ हजार भारु, तीन हजार ३०० युआन, २०० अमेरिकी डलर बरामद भएको छ । दुलही बनाएर गरिने अन्तर्राष्ट्रिय मानव तस्करीको यो नयाँ शैलीलाई ‘व्रिड्स वाइङ’ भन्ने गरिन्छ ।

याे पनि पढ्नुस  चीनले मनाङमा अस्पताल बनाउन ३५ कराेड बढी दिने

युवतीको राहदानी बनाइदिनेदेखि काठमाडौँमा महिना दिनसम्म आफ्नै कोठामा राख्ने र सम्बन्धित सरकारी कार्यालयमा विवाह दर्ता गर्दा साक्षीसमेत दलालहरू आफैँ बस्ने गरेको जानकारी प्रहरीले दिएको छ ।

विशेषगरी आर्थिक अवस्था कमजोर भएका १८ देखि २० वर्ष उमेरका युवती र तिनका अभिभावकलाई आर्थिक प्रलोभनमा पारी चिनियाँ पुरुषसँंग विवाह गर्न सहमत गराउने गरेको पाइएको छ ।

याे पनि पढ्नुस  चिनियाँ विदेशमन्त्री भारत नजाने, आइतबार नेपालपछि सोझै पाकिस्तानतर्फ

पक्राउ अभियुक्तहरूले नेपाली युवतीलाई ४० काटेका चिनिया पुरुषहरूसँंग विवाह गराइदिने गरेका छन् । काठमाडौँ बसाइका क्रममा विवाह गर्न तयार पारिएका युवतीलाई आकर्षक पहिरन, गाढा मेकअपसँंगै पाको उमेरका चिनियासँंग विवाह गर्न प्रोत्साहित गर्ने गरेको पाइएको छ ।

यसरी विवाह गरी चीन लगिएका युवतीलाई देह व्यापारका लागि होटल तथा रेस्टुराँ र यौन अखडामा काम गर्न लगाएर पुरुष फरार हुने गरेका छन् । केही महिनाअघि पाकिस्तानले पनि मानव बेचबिखनमा संलग्न चिनियाँ युवालाई पक्राउ गरेको थियो ।

मानव बेचबिखनमा संलग्न चिनियाँ आपराधिक समूहले दक्षिण एसियाका भारत, नेपाल, पाकिस्तान र पूर्वी एसियाका फिलिपिन्स र बर्माबाट युवतीहरू विवाह गरी चीन लैजाने गरेको छ । त्यहाँ देह व्यापारमा लगाउने गरेको पाइएको छ । गोरखापत्र दैनिकबाट

कमेन्ट गर्नुहोस्