आत्महत्या गर्छु भनेर धम्की दिएको आधारमा कसैले छुट पाउँदैनन्ः मन्त्री पण्डित

विराटनगरः सङ्घीय मामिला तथा सामान्य प्रशासनमन्त्री लालबाबु पण्डितले भ्रष्टाचार गर्नेलाई दण्डित गर्ने कार्य शुरु भएको बताएका छन् ।

विराटनगर बसपार्क व्यवस्थापन समितिद्वारा आज आयोजित बडादशैँ, दीपावली तथा छठ पर्वको शुभकामना आदानप्रदान तथा प्रहरी बिट र नागरिक सहायक कक्षको उद्घाटन कार्यक्रममा मन्त्री पण्डितले यस्तो बताएका हुन् । उनले भने, ‘मुलुकमा भ्रष्टाचार गर्नेलाई दण्डित गर्ने कार्य शुरु भएको छ भन्दै आत्महत्या गर्छु भनेर धम्की दिएको आधारमा कोही कसैले छुट पाउँदैनन् ।’

याे पनि पढ्नुस  आर्थिक समृद्धि नै सरकारको पहिलो लक्ष्य होः मन्त्री पण्डित

यस्तै मन्त्री पण्डितले मन्त्रालयअन्तर्गत नगर र गाउँपालिका केन्द्र जोडिने ४ हजार पाँच सय कि.मी सडक सञ्जाल निर्माण कार्य अगाडि बढेको बताए । उनले नेपालको कूल बजेटको २५ प्रतिशत रकम सडक निर्माणमा खर्च हुने चर्चा गर्दै सडक निर्माणमा न्यून गुणस्तरीय निर्माण गर्नेलाई दण्डित गरिने धारणा व्यक्त गरे । उनले यस क्षेत्रका जनतालाई सहज आवागमनका लागि विराटनगरको रानी–निमुवा नहर सडकको कालोपत्र गर्ने कार्यको आगामी हप्ता शिलान्यास गरिने जानकारी दिए ।

याे पनि पढ्नुस  कोरोना कहरः गुजरातमा एकै परिवारका चार नेपालीले गरे आत्महत्या

मन्त्री पण्डितले अहिले नेपालको वार्षिक वृद्धिदर सात प्रतिशतभन्दा बढी रहेको जानकारी दिँदै वर्तमान सरकारले ११ प्रतिशत पुर्याउने लक्ष्यले काम गरिरहेको र यसैबाट मुलुकमा समृद्धी आई जनतालाई खुशी तुल्याउने धारणा राखे । उनले अहिले जनताले जहाँ खोजे त्यहीँ सरकार रहेको चर्चा गर्दै तीन तहको सरकारको सहकार्यमा मुलुकको विकास अघि बढ्ने विश्वास व्यक्त गरे ।

जिल्ला प्रहरी कार्यालय मोरङका प्रमुख विश्व अधिकारीले समुदाय प्रहरी साझेदारीका कारण विगत दुई महीनामा यस क्षेत्रमा अपराधका घटनामा कमी आएको जानकारी दिए ।

याे पनि पढ्नुस  क्वारेन्टाइनमा राख्दा भाग्ने प्रयास गरेका पुरुषले गरे आत्महत्या

बस व्यवस्थापन समितिका अध्यक्ष पदम श्रेष्ठ, उपाध्यक्ष राजन कँडेल, विराटनगर–११ का वडाध्यक्ष तीर्थेन्द्र न्यौपाने, नेपाल यातायात व्यवसायी राष्ट्रिय महासङ्घ प्रदेशका संयोजक सरोज श्रेष्ठले बसपार्कमा आगामी दिनमा आधुनिक स्वागतद्वार, घण्टाघर, विश्वकर्मा भगवान्को मन्दिर, ज्येष्ठ नागरिक कक्ष, वाचनालय, धुलो पखाल्ने प्रविधि, आधुनिक यात्रु प्रतीक्षालय, शुद्ध र चिसो पिउने पानी उपलब्ध गराउनाका साथै छिमेकी मुलुक सरहको नमूना बसपार्क बनाउने जानकारी दिए ।

कमेन्ट गर्नुहोस्