कानुनमन्त्री ढकाल र विश्व बैंकका बरिष्ठ उपाध्यक्ष ओकोरोबीच भेटवार्ता

काठमाडौंः संयुक्त राज्य अमेरिकाको वासिङ्टन डिसीमा विश्व बैंक समूहले आयोजना गरेको कानुन, न्याय र विकास समुहको कार्यक्रममा सहभागी भएका कानुन, न्याय तथा संसदीय मामिला मन्त्री भानुभक्त ढकालले विश्व बैंक समूहका कानुन हेर्ने बरिष्ठ उपाध्यक्ष स्याण्डी ओकोरोसँग भेटवार्ता गरेका छन् ।

कात्तिक १८ गतेदेखि २१ गतेसम्म भएको कार्यक्रमको अन्तिम दिनमा भेटवार्ता भएको हो । भेटवार्ताको क्रममा मन्त्री ढकालले आर्थिक रुपमा विपन्न नागरिक, सिमान्तकृत वर्ग र पिछडिएको समुदायको न्यायमा पँहुच अभिबृद्धि गर्ने कार्यमा प्रविधिको प्रयोग तथा हालै निर्माण भएको मौलिक हक र संघीयता कार्यान्वयनसँग सम्बन्धित कानुनहरुको कार्यान्वयनमा सहयोग विस्तार गर्न समेत आग्रह गरे ।

उपाध्यक्ष स्याण्डी ओकोरोले सन् २०२० मा नेपालको भम्रण गर्ने बताउँदै नेपाल सरकारको कानुन र न्यायको क्षेत्रमा निर्धारण गरेको प्राथमिकता क्षेत्रमा आवश्यक सहयोग गर्ने प्रतिबद्धता व्यक्त गरेकी थिइन् ।

भेटवार्तामा मन्त्री ढकालको साथमा संयुक्त राज्य अमेरिकाको लागि नेपालको राजदूत डा. अर्जुनकुमार कार्की, कानुन,न्याय तथा संसदीय मामिला मन्त्रालयका सह–सचिव मानबहादुर अर्यालको सहभागिता रहेको थियो ।

कमेन्ट गर्नुहोस्