श्रीलंकालाई चौथो झड्का, सोनु खड्काले लिइन् लगातार २ विकेट

काठमाडौंः १३ औं दक्षिण एसियाली खेलकुद (साग) को महिला क्रिकेट अन्तर्गत नेपाल विरुद्धको खेलमा टेष्ट राष्ट्र श्रीलंकाले चौथो विकेट गुमाएको छ ।

उसले चौथो विकेटका रुपमा कविशा दिलहारीलाई शून्य रनमा गुमाएको हो । उनलाई शोनु खड्काले एल्बीडब्लू आउट गरिन् । यसअघि उनले श्रीलंकाको तेस्रो विकेट जनादी अनालीलाई ३५ रनमा पनि आउट गरेकी थिइन् ।

सोनुले लगातार २ विकेट लिन सफल भएकी हुन् । यसअघि श्रीलंकाले हर्षित मडावीलाई १६ र उमेषा थिमाशिनीलाई २ रनमा गुमाईसकेको छ ।

नेपाल र श्रीलंका विरुद्धको खेल पोखरा रंगशालामा हुँदैछ । सागमा स्वर्ण जित्ने लक्ष्य लिएको नेपाली महिला टिमका लागि श्रीलंकासँगको खेल निकै महत्वपूर्ण रहेको छ ।

फाइनलमा पुग्न नेपालले आज श्रीलंकालाई हराउँनैपर्ने हुन्छ । अघिल्ला दुई खेलमा एक जित र एक हार व्यहोरेको नेपाल तालिकाको तेस्रो स्थानमा छ ।

नेपालले २ खेलमा २ अंक जोडेको छ । श्रीलंका २ खेलमा २ अंक जोडेर दोस्रो स्थानमा रहेको छ । राउण्ड रोबिनको आधारमा जारी महिला क्रिकेटको शीर्ष दुई टिमले स्वर्णका लागि खेल्ने छन् ।

३ खेलमा अपराजित बंगलादेश ६ अंक जोडेर फाइनल पुगिसकेको छ । पहिलो खेलमा माल्दिभ्सविरुद्ध नेपालले १० विकेटको जित निकालेको थियो । टेष्ट राष्ट्र बंगलादेशसँग भने नेपाल १० विकेटको पारजित हुन पुग्यो ।

हालसम्म श्रीलंकासँग खेलेका  २ खेलमा नेपालले जित हासिल गर्न सकेको छैन । यदि आज घरेलु मैदानमा श्रीलंकालाई हराए इतिहास रच्न सफलसमेत हुनेछ ।

कमेन्ट गर्नुहोस्