काठमाडौंः ओमान र नेपाली क्रिकेट टीम एकदिवसीय अन्तर्राष्ट्रिय मान्यता पाएपछि पहिलोपटक खेल्न लागेका छन् । यी दुई टिमबीचको भेट माघ २२ गतेदेखि कीर्तिपुर स्थित टियू क्रिकेट मैदानमा हुनेछ । नेपालले यअघि ओमानसँग सात खेल खेलेको थियो । जसमा एक खेल लिस्ट ‘ए’ र अन्य ६ एकदिवसीय थियो ।
पछिल्लोपटक २०१३ मा बर्मुडामा भएको खेलमा नेपालले ओमानलाई २८ रनले पराजित गरेको थियो । त्यो समयको ओमान र अहिलेको ओमान टीममा थुप्रै परिवर्तन आएका छन् । ओमान २०२० मा अष्ट्रेलियामा हुने आइसीसी टी–२० बिश्वकप खेल्न लागेको छ । उसले दोस्रोपटक टी–२० विश्वकप खेल्ने मौका पाएको हो ।
ओमानसँग एकदिवसीय अन्तर्राष्ट्रिय मान्यता पनि छ । लिग–२ मा ओमान ६ खेलबाट ४ मा जित हात पार्दै ८ अंकका साथ चौथो स्थानमा छ । अमेरिका ८ खेलमा ६ मा जित हात पार्दै पहिलो र स्कटल्याण्ड ९ अंक सहित तेस्रो स्थानमा रहेको छ ।
ओमान र नेपालको टिमबीचको ७ भेटमा नेपालले तीन खेल जितेको छ । पाकिस्तानी र भारतीय मूलका क्रिकेटरले भरिपूर्ण ओमानले नेपाललाई लगातार ४ खेलमा पराजित गरेको छ । नेपालले शुरुवाती तीन खेलमा जीत निकालेको थियो । नेपालको ओमानबिरुद्ध पहिलो भेट सन् २००२ को एसीसी ट्रफिमा भएको थियो ।
उक्त खेलमा १ सय ५४ रनको लक्ष्य पछ्याएको ओमनलाई ४८ रनमा रोक्दै नेपालले १ सय ५ रनको विशाल जित दर्ता गरेको थियो । यी दुई टोलीको पछिल्लो भेट सन् २०१८ मा मलेसियामा आयोजना भएको एसिया कप छनोटमा भएको थियो जसमा नेपालले तीन विकेटको हार व्यहोरेको थियो ।
ओमानविरुद्ध नेपाल (हेड टु हेड)
एसीसी ट्रफी– जुलाई १२, २००२, नेपालः १५३–९, ५० ओभर, ओमान– ४८ः१०, ३५.३ ओभर, नेपाल १०५ रनले विजयी ।
एसीसी ट्रफी एलिटः अप्रिल २, २०१०ः ओमान १६९–९, ५० ओभर, नेपालः १७२–४, ३८.३ ओभर, नेपाल ६ विकेटले विजयी ।
आइसीसी विश्व क्रिकेट लिग डिभिजन–३ः मे २, २०१३ः नेपालः १६०–९, ५० ओभर, ओमानः १३२–१०, ४६.४ ओभर, नेपाल २८ रनले विजयी ।
एसीसी प्रिमियर लिगः मे ४, २०१४, नेपालः १५७–१०, ४५ ओभर, ओमानः १६१–८, ४७.५ ओभर, नेपाल २ विकेटले पराजित ।
एसोसियेट्स म्याचेचः नोभेम्बर १४, २०१५, नेपालः १८४–१०, ४९.३ ओभर, ओमानः १८७–७, ४८.१ ओभर, नेपाल ३ विकेटले पराजित ।
आइसीसी विश्व क्रिकेट लिग डिभिजन–२ः फेब्रुअरी ९, २०१८ः नेपालः १३८–१०, ४६ ओभर, ओमानः १३९–४, ३५.१ ओभर, नेपाल ६ विकेटले पराजित ।
एसिया कप छनोटः मे २, २०१३, नेपालः २२१–९, ५० ओभर, ओमानः २२४–१०, ४८ ओभर, नेपाल ७ विकेटले पराजित ।
