जुस स्टोरबाट ३० लाख चोरी गर्ने पक्राउ

काठमाडौंः ललितपुर महानगरपालिका–४ जावलाखेलस्थित पशुपती भिभान्ता नामक जुस स्टोरबाट नगद चोरी गरेको अभियोगमा काठमाडौं महानगरपालिका–१४ कलंकी खड्का गाउँ डेरा गरी बस्ने खगेन्द्रकुमार थापालाई प्रहरीले पक्राउ गरेको छ ।

उक्त स्टोरबाट गत शुक्रबार नगद ३० लाख रुपैयाँसहित जिन्सी धनमाल चोरी भएको थियो । महानगरीय प्रहरी परिसर ललितपुरबाट खटिएको प्रहरीले सोही स्टोरमा काम गर्ने थापाको कोठामा तलासी लिने क्रममा झोलामा लुकाई छिपाई राखेको अवस्थामा नगद २० लाख ५० हजार रुपैयाँ, घटनास्थलमा प्रयोग गरेको छाता, मोबाइल र ज्याकेटसमेत फेला पारी उनलाई पक्राउ गरेको हो ।

थापालाई चोरी मुद्धामा आवश्यक अनुसन्धान भइरहेको उक्त परिसरले जनाएको छ ।

कमेन्ट गर्नुहोस्