विद्यालयको दिवा खाजामा कोदोको रोटी, पिँडालु र सिस्नुको साग!

बैतडीः बैतडीका स्थानीय तहले विद्यालयको दिवा खाजामा स्थानीय उत्पादनलाई जोड दिएर विद्यार्थीलाई अर्ग्यानिक दिवा खाजा खुवाउन थालेका छन् । बैतडीका १० वटै स्थानीय तहले विद्यालयमा दिवा खाजाका रुपमा दैनिक सूची नै तयार गरेर कोदोकाे राेटी, घ्यू, हरियो साग, सिस्नोको साग, उसिनेको आलु, पीँडालु, अण्डा, दाल र गेडागुडी र फलफूल खुवाउन थालेका छन् ।

जिल्लाको दोगडाकेदार गाउँपालिकाले आइतबार अण्डा, हरियो साग, घ्यू र चामल, सोमबार पुरी, आलुको तरकारी र हरियो साग, मंगलबार भिजाएको भट्मास र हरियो साग, बुधबार उसिनेको आलु वा पीँडालु र गेडागुडी, बिहीबार उसिनेको मकैं, तरकारी र हरियो साग, शुक्रबार स्थानीय फलफूल र गेडागुडीको सूची तयार गरेर दिवा खाजा खुवाउन थालेको छ ।

दोगडाकेदारको चनै आधारभूत विद्यालयको दिवा खाजामा एक दिन सिस्नुको झानेको साग र मकैको ढिडो खुवाईरहेको विद्यालयका प्रधानाध्यापक दमयन्ति जोशीले बताए । सिस्नोको झानेको साग बनाउने विधिका बारेमा सहायक प्रधानाध्यापक भूवनेश्वरी भट्ट तालिम लिएपछि विद्यालयको दिवा खाजामा सिस्नोलाई प्राथमिकता दिइएको छ ।

सहायक सहायक प्रधानाध्यापक भूवनेश्वरी भट्ट भन्छिन्, ‘दुई चम्चा सिस्नोको सागमा एक किलो मासु बराबरको क्यालेरी प्राप्त हुने कुरा मैले तालिम लिएपछि थाहा पाए । सिस्नो निकै पौष्टिक आहारा रहेछ ।’

विद्यालयमा आर्गनिक दिवा खाजा खुवाउँदा विद्यार्थीको स्वास्थ्य र स्थानीय उत्पादन दुबैलाई फाईदा पुग्ने भएकोले विद्यालयमा स्थानीय उत्पादनको सूची तयार गरेर दिवा खाजा खुवाउन थालिएको दोगडाकेदार गाउँपालिकाका अध्यक्ष चक्र कार्कीले बताए ।

शिवनाथ गाउँपालिकाले पनि आइतबारदेखि शुक्रबारसम्मको दिवा खाजाको सूची नै बनाएर विद्यार्थीलाई गाउँमै उत्पादन भएको स्थानीय कोदो, हरियो सागपात र गेडागुडीलाई प्राथमिकता दिएको छ ।

शिवनाथ गाउँपालिकामा कोदो बढी फल्ने भएकोले अन्य खानासँगै कोदोलाई बढी प्राथमिकता दिइएको शिवनाथ गाउँपालिकाका अध्यक्ष कर्ण साउँदले जानकारी दिए ।

दिवा खाजाको रुपमा स्थानीय उत्पादन जे छ त्यसैलाई दिवा खाजाका रुपमा समेटिएको दशरथ चन्द नगरपालिकाका उपप्रमुख मीना चन्दले बताइन् ।

बैतडीमा ६ गाउँपालिका र चार नगरपालिका गरी १० स्थानीय तह रहेका छन् । दशरथ चन्द नगरपालिका, पुरचौडी नगरपालिका, मेलौली नगरपालिका, पाटन नगरपालिका, शिवनाथ गाउँपालिका, पञ्चेश्वर गाउँपालिका, दोगडाकेदार गाउँपालिका, डिलासैनी गाउँपालिका, सिगास गाउँपालिका र सुर्नया गाउँपालिका रहेका छन् ।

विद्यालयमा पत्रु खाना (जङ्क फुड) बाहेक गाउँमा जे फल्छ त्यसैलाई समाबेस गरिएको सुर्नया गाउँपालिकाका अध्यक्ष वीरबहादुर बिष्टले बताए । प्रति विद्यार्थी दैनिक १५ रुपैयाँ बराबरको दिवा खाजा खुवाउनु पर्ने भएकोले केही दुर्गम गाउँका विद्यालयमा रकम अपुग भएको गुनासो आउने गरेको अध्यक्ष बिष्टले बताए । विद्यालयका गुनासो सुन्न र दिवा खाजालाई कसरी प्रभावकारी बनाउन सकिन्छ भन्ने विषयमा विद्यालयमै पुगेर अनुगमन गर्ने तयारी भईरहेको उनले जानकारी दिए । –गाेरखापत्र अनलाइनबाट

कमेन्ट गर्नुहोस्