एउटै अस्पतालका २०६ स्वास्थ्यकर्मीमा कोरोना सङ्क्रमण

एजेन्सीः भारतको राजधानी नयाँ दिल्लीस्थित एक प्रमुख अस्पताल अल इन्डिया इन्स्टिच्युड (एम्स) मा कोभिड–१९ बाट अहिलेसम्म सङ्क्रमित स्वास्थ्यकर्मीको सङ्ख्या २०६ पुगेको अस्पतालले जनाएको छ ।

शुक्रबार सार्वजनिक रिपोर्टअनुसार अस्पतालका ११ कर्मचारीमा कोरोना भाइरस सङ्क्रमण पुष्टि भएको छ भने बिहीबार ३० स्वास्थ्यकर्मी सङ्क्रमित भएका थिए ।

सङ्क्रमित स्वास्थ्यकर्मी तथा कर्मचारीबारे सोधिएको प्रश्नमा अस्पतालका सुपरिन्टेन्डेन्ट तथा चिकित्सक डिके शर्माले भने, ‘हामीले हाम्रा स्वास्थ्यकर्मी तथा कर्मचारीका लागि आवश्यक सबै पूर्व सावधानी र सुरक्षाका उपाय अपनाएका छौँ । हाम्रा कर्मचारी सङ्क्रमित भएको पुष्टि हुँदासाथ उनीहरूलाई अलग राखेर उपचार सुरू गर्ने र उनीहरूको सम्पर्कमा आएका विरामी तथा कर्मचारीहरूलाई खोजी गर्ने र आबश्यक अन्य सावधानीहरू अपनाउने गरेका छौँ ।’

याे पनि पढ्नुस  चीनकाे बेइजिङ र सांघाइका विद्यालय खुले

उनले भने, ‘कुनै पनि स्वास्थ्यकर्मी वा कर्मचारी एम्समा काम गर्ने शिलशिलामा सङ्क्रमित भएको पाइएको छैन ।’ एम्सले सङ्कलन गरेको पछिल्लो तथ्याङ्क अनुसार सङ्क्रमित कर्मचारीमा चिकित्सक तथा गैर–चिकित्सक दुबै रहेका भेटिएको छ । यसरी सङ्क्रमित भएकामध्ये १० आवासीय चिकित्सक, २६ नर्स र ६९ जना सुरक्षा गार्ड साथै ३४ जना सरसफाइसम्बन्धी काम गर्ने कर्मचारी रहेका अस्पताले बताएको छ ।

याे पनि पढ्नुस  २४ घण्टामा कोरोनाः अमेरिका भन्दा ब्राजिलमा बढी मृत्यु

सङ्क्रमित भएकाहरूमध्ये धेरैले उपचारपछि निको भएर क्वारेनिटनपछि अस्पतालमा पुनः काम थालेका छन् । अस्पतालले आफ्ना कर्मचारीलाई सुरक्षाका लागि आवश्यक पर्ने सबै किसिमका सुरक्षा सामग्री उपलब्ध गराएको दावी शर्माले गरे ।

भारतको संघीय स्वास्थ्य मन्त्रालयका अनुसार शनिबार बिहानसम्म एक लाख ७३ हजारभन्दा बढीमा सङ्क्रमण पुष्टि भएको छ भने चार हजार नौ सय ८० जनाको मृत्यु भएको छ ।

कमेन्ट गर्नुहोस्