प्रधानमन्त्री ओलीले दिए फ्रान्स र आयरल्याण्डका प्रधानमन्त्रीलाई बधाई

काठमाडौं : प्रधानमन्त्री केपी शर्मा ओलीले फ्रान्स र आयरल्याण्डका नवनियुक्त प्रधानमन्त्रीलाई आज बेग्लाबेग्लै बधाई सन्देश पठाउँदै सफल कार्यकालको शुभकामना व्यक्त गरेका छन् ।

फ्रान्सका प्रधानमन्त्री जँ कास्टेक्सलाई पठाएको बधाई सन्देशमा नेपाल र फ्रान्सबीच पुरानो मैत्री एवं जनस्तरको सम्बन्धको चर्चा गर्दै उनले सुदृढ आर्थिक साझेदारीमा जोड दिएका छन् । नेपालको सामाजिक-आर्थिक उन्नयनमा फ्रान्सले गरेको सहयोगको प्रधानमन्त्री ओलीले सराहना गरेका छन् ।

याे पनि पढ्नुस  सामाजिक सञ्जालमा प्रधानमन्त्रीः अस्पतालबाटै ट्वीट गर्दै के भने ?

यसैगरी आयरल्याण्डका नवनियुक्त प्रधानमन्त्री माइकल मार्टिन टिडीलाई पठाएको बधाई सन्देशमा प्रधानमन्त्री ओलीले उनसँग निकट सम्पर्कमा रहेर पारस्परिक लाभका खातिर सहकार्य गर्न आफू इच्छुक रहेको बताएका छन् । आगामी सन् २०२१-२२ का लागि राष्ट्रसङ्घीय सुरक्षा परिषद्को अस्थायी सदस्यमा आयरल्याण्ड निर्वाचित भएकामा प्रधानमन्त्रीले बधाई ज्ञापन गर्नुभएको परराष्ट्र मन्त्रालयले जनाएको छ ।

याे पनि पढ्नुस  यी हुन् नेकपा सचिवालय बैठकले गरेका चार निर्णय

दुवै देशका प्रधानमन्त्रीलाई पठाएको बधाई सन्देशमा प्रधानमन्त्री ओलीले कोभिड-१९ को महामारीविरुद्ध अन्तर्राष्ट्रिय समुदाय बीचको सहयोग र ऐक्यबद्धतामा विशेष जोड दिएका छन् ।

कोभिड-१९ का कारण उत्पन्न अहिलेको कठिन परिस्थितिमा आयरल्यान्ड र फ्रान्समा रहेका नेपालीलाई त्यहाँका सरकारबाट प्राप्त अमूल्य सहयोगप्रति आभार व्यक्त गर्दै प्रधानमन्त्री ओलीले नेपालमा रहेका ती देशका नागरिकलाई नेपाल सरकारले निरन्तर सहयोग गर्ने प्रतिबद्धता सन्देशमा व्यक्त गरेका छन् ।

कमेन्ट गर्नुहोस्