कोरोना महामारीको केन्द्र उहानबाट पूर्ण क्षमतामा आन्तरिक हवाई उडान सुरु

बेइजिङ : कोरोना भाइरस महामारीको केन्द्रका रूपमा चिनिएको चीनको उहान शहरबाट पूर्ववत रूपमा आन्तरिक उडान सुरु भएको छ ।

उहानमा गत वर्षको अन्त्यतिर कोरोना संक्रमित पहिलो व्यक्ति भेटिएका थिए । त्यसपछि उक्त शहरलाई झण्डै ७६ दिन पूर्ण लकडाउनमा राखिएको थियो । शहरमा कोरोनाको संक्रमण तीव्र रूपमा फैलिइसकेको भन्दै सरकारले रातारात अस्पताल पनि निर्माण गर्नु परेको थियो ।

गत अप्रिल महिनाको सुरुमा आंशिक खुला भएको उहानमा जनजीवन विस्तारै खुकुलो हुँदै गएको छ भने आन्तरिक उडान नियमित हुन थालेका छन् । उहान तियान्हे अन्तर्राष्ट्रिय विमानस्थलका एक अधिकारीले शुक्रबार एकै दिन ५ सय वटा आन्तरिक उडानबाट ६४ हजार ७ सय यात्रुले सेवा लिएको जानकारी दिए ।

यस विमानस्थलबाट चाँडै नै सियोल, सिंगापुर, क्वालालम्पुर र जकार्ताको उडान सुरु गर्न लागिएको सिन्ह्वा समाचार समितिले विमानस्थलका एक अधिकारी झु झियानीको भनाई उद्धृत गर्दै जनाएको छ ।

अन्तर्राष्ट्रिय कार्गो सेवा भने देशका प्रमुख औद्योगिक शहर तथा आम्स्र्टडम र नयाँदिल्ली जस्ता गन्तव्यमा शुरु भइसकेका छन् ।

चीनमा झण्डै एक महिनाभित्र स्थानीय रुपमा संक्रमणका कुनै पनि बिरामी भेटिएका छैनन् । आइतबार भेटिएका १० जना संक्रमितहरु अन्यत्रबाट आएका व्यक्ति रहेको चिनियाँ स्वास्थ्य आयोगले जनाएको छ ।

चिनियाँ अस्पतालमा हाल १ सय ५१ जनाको उपचार भइरहेको र ३ सय ५७ जनालाई आइसोलेसनमा राखिएको छ । चीनमा कोरोना संक्रमितको कूल संख्या ८५ हजार १ सय ८४ जना रहेका र त्यसमध्ये चार हजार ६ सय ३४ जनाको मृत्यु भएको थियो । एजेन्सी

कमेन्ट गर्नुहोस्