१७९ दिनपछि आन्तरिक उडान सुचारु, पिसिआर रिपाेर्ट अनिवार्य नहुने

काठमाडौं । कोरोना महामारीका कारण रोकिएको आन्तरिक उडान आजबाट शुरु हुँदैछ ।

गत चैत ११ गतेदेखि आन्तरिक उडानमा प्रतिबन्ध लागेको थियो । नागरिक उड्डयन प्राधिकरणले आइतबार काठमाडौंसहित देशभरका सबै विमानस्थलका लागि ९ वटा वायुसेवा कम्पनीहरुलाई उडान तालिकासहित अनुमति दिएको छ ।

सोमबारका दिन काठमाडौं, विराटनगर, पोखरा, नेपालगन्ज, सुर्खेतबाट ५४ वटा उडानलाई अनुमति दिइएको छ ।

  1. बुद्ध एयर ७
  2. यति एयर ११
  3. नेपाल वायुसेवा निगम ८
  4. श्री एयरलायन्सलाई ६
  5. तारा एयर ५
  6. समिट एयर ४
  7. सीता एयर २
  8. सिम्रिक एयर १

जम्मा ५४

सौर्य एयरलायन्सलाई उडान अनुमति दिएको छैन ।

संस्कृति, पर्यटन तथा नागरिक उड्डयन मन्त्रालयले यी वायुसेवालाई माघ–चैतमा पाएको उडान अनुमतिको हिस्साका आधारमा २५ प्रतिशतमात्रै उडान तालिका स्वीकृत गरेको हो ।
दुई दर्जन हाराहारी विमानस्थल खुला हुने बताए ।

खुल्ला हुने विमानस्थल

भद्रपुर, विराटनगर, राजविराज, जनकपुर, सिमरा, भरतपुर, भैरहवा, नेपालगन्ज, धनगढी, साफेबगर, बाजुरा, हुम्ला, जुम्ला, रारा, डोल्पा, जोमसोम, सुर्खेत, रुकुम, लुक्ला, फाप्लु, खानिडाडा, भोजपुर, लामिडाडा, ताप्लेजुङ

पिसिआर अनिवार्य छैन

आन्तरिक उडानमा सबै वायुसेवाले जहाजको यात्रु क्षमताअनुसार, टिकट बिक्री गर्न पाउनेछन् । तर, पीसीआर लगायतका जाँच अनिवार्य गरिएको छैन । विमानस्थलमा यात्रुहरुले अब आफू स्वस्थ्य रहेको फारमसहित विस्तृत विवरण भरेर बुझाउनु पर्ने नियम छ । त्यस्तै पहिलेको दाँजोमा उडान सयम भन्दा कम्तीमा दुईदेखि डेढ घन्टाअघि नै विमानस्थल पुग्नु पर्ने छ । हाते झोलबाहेक पहिले जस्तो लगेज साथै लैजान रोक लगाइएको छ । घरपालुवा जनावर पनि हाललाई ओसारपोसारमा रोक लगाइएको छ । वायुसेवाहरुले ७० वर्षभन्दा माथि उमेर भएका, दीर्घरोगी, गर्भवती महिलालाई सकभर यात्रा नगर्न सुझाएको छ ।

खाजामा रोक, मास्क अनिवार्य

यसअघि विमानभित्र प्राप्त हुने पत्रपत्रिका, खाजा, पानी लगायतका सुविधा हाललाई रोक लगाइएको छ । विमानस्थलमा यात्रुको तापक्रम अनिवार्य जाँच हुनेछ भने यात्रुले मास्क लगाउनु पर्ने नियम पनि अनिवार्य बनाइएको छ ।

निरिक्षण कमिटि

प्राधिकरणले वायुसेवा र यात्रुहरुले संक्रमण रोकथामका उपाय अबलम्बन गरे नगरेको अनुगमन गर्न सबै विमानस्थलमा प्रमुखसहित शुरक्षा निकायसहितको सहभागितामा निरीक्षण गर्न कमिटी बनाएको छ । यो कमिटीले विमानस्थल खुला भएपछि निगरानी गर्ने छ । प्राधिकरणले एक सातापछि अहिलेको जारी १० दिनको उडान तालिकालाई वायुसेवा कम्पनीको मागको आधारमा थपघट गर्दैअर्को तालिका सार्वजनिक गर्नुपर्ने छ ।

कमेन्ट गर्नुहोस्