केपी ओली जनताको अधिकार खोस्ने शासक : अष्टलक्ष्मी शाक्य

काठमाडौं । नेकपाकी नेतृ अष्टलक्ष्मी शाक्यले प्रधानमन्त्री केपी ओली सर्वसत्तावादी शासक बनेको बताएकी छन् ।

संसद् विघटनको विरोधमा पार्टीले आयोजना गरेको सभामा बोल्दै शाक्यले प्रधानमन्त्री ओलीले जनताले गरेको आन्दोलन र संविधानको अपेक्षा पूरा गर्न नसकेको बताइन् ।

काठमाडौंमा मंगलबार आयोजित कार्यक्रममा नेतृ शाक्यले भनिन्, ‘जनताको शक्तिको अगाडि राजसंस्था त टिकेन भने केपी ओली कहाँ टिक्छ ? केपी ओली आज कामरेड बन्नुभएन, सामन्ती शासक बन्नुभयो, सर्वसत्तावादी शासक बन्नुभयो । जनताको अधिकार खोस्ने शासक बन्नुभयो ।’

‌ओली नेतृत्वको सरकारले सुशासन, महिला सुरक्षा लगायतका कुरामा चुकेको नेतृ शाक्यको भनाइ थियो । नेकपाको नेतृत्वमा लोकतान्त्रिक गणतन्त्रमा जनताले सुख पाउलान् भन्ने अपेक्षा राखेकोमा अहिले त्यसो हुन नसकेको उनको भनाइ थियो ।

ुकेपी ओली प्रधानमन्त्री भइसकेपछि मुलुक अगाडि बढ्छ । गणतन्त्र, समाजवाद अगाडि बढ्छ लागेको थियो । जनताले दुःख पाउने छैनन् लागेको थियो । जनताले सडकमा जानुपर्ने छैन लागेको थियो । तर फेरि एकचोटी संघीय गणतन्त्रमाथि, संविधानमाथि प्रहार गरेको छ । संविधानमाथि कू गरेको छ,ु शाक्यले भनिन् ।

पुष्पकमल दाहाल प्रचण्ड र माधवकुमार नेपाल पक्षले मंगलबार देशभर संसद विघटनको विरोधमा प्रदर्शन गरिरहेको छ । काठमाडौंको कार्यक्रममा अध्यक्षद्वय दाहाल र नेपाललगायतका नेताहरू सहभागी रहेका छन् । प्रधानमन्त्री ओलीको सिफारिसमा पुस ५ गते राष्ट्रपति विद्यादेवी भण्डारीले प्रतिनिधिसभा विघटन गरेकी थिइन् ।

कमेन्ट गर्नुहोस्