प्रतिकारपछि भारतीय सुरक्षाबलले दशगजा क्षेत्रमा खडा गरेको पोष्ट हटायो

नेपाल भारत सीमाको कञ्चनपुरको बेलौरी नगरपालिका–१० नजिकै दशगजा क्षेत्रमा भारतीय सीमा सुरक्षा बल (एसएसबी)ले बनाएको अस्थायी पोष्ट हटाएको छ । सीमा स्तम्भ नम्बर ३४ र ३५ को बीचमा रहेको दशगजा क्षेत्रमा भारतीय एसएसबीले नेपाली पक्षको विरोधका कारण बनाएको अस्थायी पोष्ट हटाएको हो ।

बुधबार एसएसबीले दशगजा क्षेत्रमा त्रिपाल राखेर अस्थायी पोष्ट राखेको जानकारी स्थानीय बासिन्दाले सशस्त्र प्रहरीलाई दिएका थिए । सशस्त्र प्रहरीले एसएसबीका उच्च अधिकारीसँग समन्वय गरी पोष्ट हटाउन लगाएको छ । सशस्त्र प्रहरी बल नम्बर ३५ गण हेडक्वार्टर शैलेश्वरी कञ्चनपुरका सशस्त्र प्रहरी उपरीक्षक वीरेन्द्रबहादुर ऐरले दशगजा क्षेत्रमा पोष्ट राखेको जानकारी पाउना साथ तत्कालै हटाउन लगाइएको बताउनुभयो ।

“एसएसबीको स्थानीय कमाण्डरको गल्तीका कारण दशगजा क्षेत्रमा पोष्ट राखेको रहेछ”, उहाँले भन्नुभयो, “एसएसबीका अधिकारीसँग समन्वय गरी बिना विवाद पोष्ट हटाउन लगाएका छौँ । भारतीयले गल्ती स्वीकार गर्दै पोष्ट हटाएका छन् ।” दशगजा क्षेत्र नेपाल भारतको सीमा छुट्याउने विन्दु भएकाले दुवै देशले कुनै पनि किसिमको गतिविधि गर्न पाउँदैनन् ।

दशगजा क्षेत्रमा भारतीय एसएसबीले अस्थायी पोष्ट खडा गरेको सुचना प्राप्त हुने बित्तिकै उक्त पोष्ट दशगजाबाट तत्काल हटाउनका लागि पहल गर्न सशस्त्र प्रहरीका जिल्ला प्रमुखलाई आग्रह गरेको र सुरक्षा निकाय तथा स्थानीय राष्ट्रप्रेमी जनताको अगुवाइमा दशगजामा राखिएको भारतीय एसएसबीको पोष्ट हटाइएको अन्तर्राष्ट्रिय सीमा सरोकार समुह कञ्चनपुरका संयोजक पल्लबराज भट्टले जानकारी दिनुभयो । उहाँले अन्य स्थानहरुमा पनि दशगजा वा नेपाली भूमि भित्र यस्ता गतिबिधीहरु भारतीय पक्षबाट गरिए तत्काल प्रतिवाद गर्न र सुचना सम्प्रेषण गर्न सम्पूर्ण जनसमुदायमा अनुरोध गर्नुभएको छ ।

कमेन्ट गर्नुहोस्