माधव नेपाललाई एक्लाउने रणनीतिमा ओली

भीष्म थापा ।  नेकपा एमालेले माधव नेपालसहित ११ जना स्थायी समिति सदस्यलाई कार्वाही गरेलगत्तै थप १२ जनालाई स्पष्टिकरण सोधियो ।

स्पष्टिकरण सोधिएकाहरुलाई २४ घण्टाभित्रको समय दिइएको थियो । तर उनीहरुमध्ये कसैले पनि स्पष्टिकरण दिएनन् ।

प्रतिनिधि सभा विघटनविरुद्धको रिटमा हस्ताक्षर गर्ने नेताहरुलाई स्पष्टिकरण सोधिएपछि अर्को कदम भनेको उनीहरुलाई पनि माधव नेपालहरुजस्तै साधारण सदस्यताबाट निस्काषन गर्नु हुन्थ्यो ।

त्यही बेला बसेको स्थायी कमिटी बैठकले सुदूरपश्चिम सरकारमा रहेका मन्त्रीहरुलाई फिर्ता आउन निर्देशन दिँदै सरकारलाई दिएको समर्थन अन्त्य भएको निर्णय समेत गर्यो ।

तर त्यहाँ पनि मन्त्री र स्पष्टिकरण सोधिएका अन्य सांसदले केन्द्रको निर्णय लत्याउँदै पुनर्गठित मन्त्रीमण्डलमा सहभागिता जनाए । लगत्तै प्रदेश कमिटीले उनीहरुलाई स्पष्टिकरण सोध्यो ।

यी घटनाहरु भइरहेको बेला एमालेले यो साता फेरी स्थायी कमिटी बैठक बोलायो । सबैको अपेक्षा पार्टीको निर्णय नमानेका र स्पष्टिकरण सोधिएका नेताहरुमाथि कार्वाहीको थियो । किनभने यसअघि यसरी नै स्पष्टिकरणको प्रक्रिया पुर्याएर साधारण सदस्यताबाट निष्काशन गर्ने निर्णय एमालेले गरेको थियो ।
तर यो सातामात्रै दुई दिन नै स्थायी समिति बैठक स्थगित गरियो । कारण जे सुकै देखाइएपनि यो स्थगत हुनुका पछाडि केही अन्य बस्तुगत कारण थिए ।
यसैबीच मंगलबार बसेको स्थायी कमिटी बैठकले पार्टी एकताका लागि अन्तिमसम्म प्रयास गर्ने निर्णय गर्यो । यो निर्णय हुनुअघि ओली र माधव पक्षका केही नेताहरुबीच यो साताको शुरुआतदेखि नै भइरहेका सघन छलफलहरु मुख्य कारक बनेका थिए ।

याे पनि पढ्नुस  नेकपा अध्यक्ष प्रचण्डले भेटे प्रधानमन्त्री ओली

एमालेका थप १२ जनामाथि कार्वाही गर्ने अवस्थामा संसदीय अंकगणित र आगामी निर्वाचनमा भोग्नुपर्ने नमिठो पराजयले ओली पक्षलाई झस्काएको थियो ।
यसमा थप मलजल हुने काम देउवा निवासमा भएको विपक्षी दलहरुको बैठकले गरेको थियो । बैठकमा ओली प्रवृत्ति यहीरुपमा कायम रहने अवस्थामा आगामी निर्वाचनमा माधव नेपाल पक्षसहित विपक्षी गठबन्धनले निर्वाचनमा तालमेल गर्नसक्ने सम्मको अनौपचारिक सहमति थियो । अहिले सर्वोच्च अदालतमा प्रस्तुत रिटजस्तै निर्वाचनमा समेत त्यसरी गठबन्धन हुने अवस्था भनेको ओलीका लागि प्रत्युपादक हुने निश्चित नै थियो ।

यो अवस्थामा ओली समूहले एमालेका नेताहरुमाथि कार्वाही गर्नुको साटो सकेजतिलाई फकाएर फर्काउने र माधव नेपाललगायत केहीलाई भने एक्ल्याउने विकल्पमा कसरत गरेको हो ।

यही कसरतस्वरुप ओली पक्षका दोश्रो तहका नेताहरुको दौडधुप निकै चल्यो । यो साता उनीहरुले एकल र सामूहिकरुपमा माधव पक्षका नेताहरुसँग वार्ता गर्न शुरु गरे । माधव पक्षले अघि सारेको जेठ २ मा फर्किने माग समेत मान्न ओली तयार रहेको सन्देश अघि सारे । ओली पक्षका नेताहरुले विगतको सबै तीतोपिरो बिर्सेर एकताबद्ध एमाले सम्भव भएको र त्यसका लागि माधव पक्षले केही सहज वातावरण बनाइदिनुपर्ने आग्रह गरे ।

एकातिर एकताको सन्देश दिने अर्कोतर्फ माधव नेपाललाई चेपुवामा पारेर एक्ल्याउने रणनीति ओली पक्षको भन्ने सहजै बुझ्न सकिन्छ । जेठ २ मा फर्किने शर्तका रुपमा विपक्षी गठबन्धनबाट माधव समूह अलग हुनु मुख्य हुनुपर्ने उनीहरुले राखेका छन् । यो भनेको माधव नेपालहरुले आफ्नो विश्वसनीयता गुमाउनु हो । माधव नेपालहरु विपक्षी गठबन्धनबाट फर्किए र जेठ २ को अवस्था भयो भने ओलीहरुले त्यसमा माओवादीबाट आएकाहरुको समायोजनको अर्को शर्त थप्ने देखिन्छ । यो भनेको स्थायी कमिटी र केन्द्रीय कमिटिको पुनर्गठन हुने अवस्था हो । जेठ २ मा फर्किने तर पार्टीमा बहुमत कायम राख्ने र आवश्यक पर्नेििबत्तिकै आफूसँग सहमत नहुने माधव पक्षका नेताहरुमाथि फेरि कार्वाहीको डण्डा चलाउने उनीहरुको रणनीतिका रुपमा यसलाई बुझ्न सकिन्छ ।
माधव नेपाल यो कुराका लागि नमान्ने अवस्थामा माधव समूहमा समेत विभाजन ल्याउन सकिने आँकलन ओली पक्षकाले गरेका छन् । यसका लागि योगेश भट्टराई, गोकर्ण विष्ट, सुरेन्द्र पाण्डे जस्ता नरमपन्थी नेताहरुलाई शुरुमा आफ्नो पक्षमा ल्याउन सकिने ओली पक्षको ठम्याई छ ।

याे पनि पढ्नुस  दोस्रो विज्ञप्ति जारी गर्दै अस्पतालले भन्यो, ‘प्रधानमन्त्रीको स्वास्थ्य अवस्था स्थिर’

आफू अप्ठ्यारोमा परेको बेला भावनात्मक कार्ड फाल्ने र समस्याबाट उम्किनेबित्तिकै फरक चरित्रमा उत्रिने ओली पक्षको मुख्य प्रवृत्ति नै हो । विगतमा पार्टी एकतापछि प्रचण्डलाई यही प्रवृत्ति देखाउँदै ओलीले निशानामा ल्याएका थिए । प्रचण्डले आलोपालो सहमतिदेखि स्थायी कमिटीका महिनौंसम्म चलेका बैठकमा ओलीमाथि ओलीले अरुमाथि गर्नेजस्तैगरी कार्वाही गर्न सकेका थिएनन् । यतिसम्म कि ओलीविरुद्ध प्रस्ताव नै पेश गरेपछि पनि प्रचण्डहरुले कमिटीगतरुपमा नै विधानतः नै अघि बढ्ने लचकता अपनाएका थिए । उनीहरुलाई ओली सच्चिन्छन र आत्मालोचना गर्छन् भन्ने भ्रम थियो । तर अप्ठ्यारो परिस्थितिमा ओलीले स्थायी कमिटीको अन्तिम बैठकमा संवैधानिक परिषदमा नियुक्ति भएको छैन भन्ने काम समेत गरेका थिए । जबकि त्यो नियुक्ति भइसकेको कुरा केही दिनमा नै सार्वजनिक भएको थियो ।

याे पनि पढ्नुस  अवहेलना मुद्दाः प्रधानमन्त्री ओलीलाई लिखित जवाफसहित अदालतमा उपस्थित हुन आदेश

प्रचण्डको मनोविज्ञानलाई यसरी उपयोग गरेका ओली अहिले संकट परेको बेला माधव नेपाल पक्षलाई पनि एकताको मनोविज्ञानका आधारमा घुमाउन खोजिरहेका छन् । यसको पुष्टि माधव नेपाल समूहसँग एकताका लागि पहल गर्ने भनेर कार्यदल गठन गर्नु थियो ।

माधव नेपाल पक्षले ओलीको रणनीति बुझ्न नसकी एकताको भावना बग्न पुग्दा धारा ७६ (३) अनुसार कांग्रेसको नेतृत्वमा सरकार बन्न सकेको थिएन । त्यतिखेर एकताका लागि नै भनेर माधव नेपालहरु कार्यदल निर्माणको भुलभुलैयामा फसेका थिए । तर ओलीले भने योजनाबद्धरुपमा नै माधव पक्षलाई फसाएको कुरा पछिल्ला घटनाले पुष्टि गरिसकेको छ ।

अहिले पनि माधव पक्षलाई एक्ल्याउने र उनीहरुसँग समयक्रममा निर्णायक बदला लिने रणनीति ओली पक्षको छ । यसका लागि उनीहरुले पुनः एकताको मनोविज्ञानलाई उपयोग गरिरहेका छन् । यसको मुख्य निशाना माधव नेपाल, भीम रावलहरु बनेका छन् ।

ओली पक्षको अहिलेको यो रणनीति नबुझ्ने हो भने माधव पक्ष फेरी अर्को धोका खानसक्ने घटनाक्रमहरुले स्पष्ट देखाएको छ ।

कमेन्ट गर्नुहोस्