पार्टीको लेटरप्याड र प्रचण्डको हस्ताक्षर दुरुपयोग, माओवादीद्वारा कारबाहीको माग

काठमाडौं । नेकपा माओवादी केन्द्रले पार्टीको लेटरप्याड, छाप र अध्यक्ष पुष्पकमल दाहाल प्रचण्डको हस्ताक्षर दुरुपयोग भएकोमा आपत्ति जनाएको छ ।

माओवादीले बुधबार एक विज्ञप्ति जारी गर्दै पार्टीको लेटरप्याड, छाप र अध्यक्षको हस्ताक्षर दुरुपयोग गरेर मन्त्रिमण्डल विस्तारबारे भ्रामक प्रचार भएकोप्रति आपत्ति जनाउदै त्यस्ता कार्यमा संलग्नमाथि कडा कारवाही गर्न माग गरेको छ ।

माओवादी केन्द्रीय कार्यालयका सचिव श्रीराम ढकालले केही अपराधिक, अराजक एवं प्रतिगामी तत्वहरुले माओवादीलाई बदनाम गर्ने उदेश्यले मन्त्रिमण्डल विस्तारबारे कुप्रचार गरेको भन्दै त्यसमा संलग्नहरूलाई कडा कारवाहीको माग गरेका हुन् ।

माओवादीले जारी गरेको विज्ञप्तिमा भनिएको छ, ‘ केही समययता यस किसिमका प्रतिगमनकारी, पश्चगामी र पुरातनवादी तत्वहरु अत्तालिएर क्रान्तिकारी र लोकतान्त्रिक शक्तिहरूलाई बदनाममा गर्ने कुत्सित मनसायले यस्ता हर्कतहरु गर्दै आइरहेका छन् । यस किसिमका किर्ते र झुठ प्रचारको भ्रममा नपर्न सिंगो पार्टी पंक्ति, लोकतान्त्रिक शक्तिहरु, र आम जनसमुदायमा समेत हाम्रो पार्टी हार्दिक अनुरोध गर्दछ ।’

कमेन्ट गर्नुहोस्