मध्यपन्थी धारलाई पेलेरै अघि बढ्यो एमाले केन्द्रीय कमिटी बैठक, समर्पण कि विद्रोहको अवस्थामा तेश्रो धार

काठमाडौं । दश बुँदे सहमति कार्यान्वयनको विषयलाई केन्द्रीय कमिटी बैठकको एजेण्डा नबनाएपछि नेकपा एमालेभित्रको मध्यपन्थी धार चरम संकटमा परेको छ ।

हिजोदेखि शुरु भएको बैठकमा मध्यपन्थी धारले उठाएको दश बुँदे कार्यान्वयनको विषयलाई बैठकको एजेण्डा बनाउन ओली तयार भएनन् । ओलीले स्पष्टरुपमा उक्त विषय एजेण्डा नबन्ने बताएपछि तेश्रो धार समर्पण गर्ने कि विद्रोह गर्ने अवस्थामा पुगेको हो ।

नेता माधव नेपालले बारम्बार कोशीस गर्दा समेत विवादित एजेण्डामा छलफल गर्न ओली नमानेपछि उनले विद्रोह गरेर नयाँ पार्टीगठन गठन गरेका थिए । मध्यपन्थी धारलाई भने अन्तर्पार्टी संघर्षबाटै एमालेभित्र लड्न सकिने लागेको थियो । तर अन्तसंघर्षका लागि समेत स्थान नदिएपछि उक्त समूह झनै संकटमा परेको हो ।

ओलीले रणनीतिकरुपमा मध्यपन्थी धारलाई उपयोग गर्न दश बुँदे कार्यान्वयन गर्ने सहमति गरेपनि आफ्ना हितविपरित कार्यान्व्यन गर्ने पक्षमा उनी देखिँदैनन् । यसको स्पष्ट उदाहरण सुदूरपश्चिम प्रदेश र बाग्मतीमा देखिएको हो ।

केन्द्रीय कमिटी बैठक आज पनि बस्ने भएको छ । आजको बैठकमा विधान महाधिवेशनका लागि तयार पारिएका तीन प्रतिवेदनमाथि भएका समूहगत छलफलका विषयहरु प्रस्तुत हुनेछन् ।

आज ११ बजे बस्ने बैठकमा समूहगत छलफलको निष्कर्ष समेटेर तीनवटै प्रस्ताव पारित गरिने छ । मध्यपन्थीहरुले हिजो बैठक बहिस्कार गरेपनि आजको बैठक के गर्छन् भन्ने टुंगो छैन । यसरी बहिस्कार गर्दै गएपनि यसले ओलीलाई भने कुनै फरक नपर्ने ओली पक्षीय नेताहरुको बुझाई छ ।
ओली पक्षको बुझाईमा मध्यपन्थीहरुलाई कतै जानसक्ने ठाउँ छैन । त्यसैले उनीहरुले जे जस्ता कुरा उठाएपनि सहजै पेलेर अघि बढ्न सकिने ओली समूहको बुझाई देखिन्छ ।

हिजोबाट ललितपुरको च्यासलस्थित तुलसीलाल स्मृति भवनमा सुरु भएको बैठकमा अध्यक्ष केपी शर्मा ओलीका तर्फबाट नेता प्रदीप ज्ञवालीले राजनीतिक प्रतिवेदन र महासचिव ईश्वर पोखरेल र उपमहासचिव विष्णु पौडेलले क्रमशः सांगठनिक र विधान संशोधन प्रस्ताव पेस गरेका थिए । एमालेले उक्त प्रतिवेदन र प्रस्तावमाथि समूहगत छलफलका लागि सात प्रदेश र एक जनवर्गीय संगठन गरी आठवटा समूह छुट्याइएको छ ।

एमालेको विधान महाधिवेशन आगामी असोज १५ देखि १७ गतेसम्म सम्म ललितपुरको गोदावरीमा हुँदैछ भने राष्ट्रिय महाधिवेशन आगामी मंसिरमा तय भएको छ ।

मध्यपन्थी धारले कम्तीमा महाधिवेशनसम्म जाने र त्यहाँ आफ्नो फरक मत राखेर राजनीतिकरुपमा आफूलाई जस्टिफाई गने रणनीति बनाएको देखिन्छ । यसो गर्दा भोली बेग्लै समूह निर्माण गर्न सकिने उनीहरुको ठम्याई देखिन्छ ।

कमेन्ट गर्नुहोस्