प्रचण्डले जारी गरे ५ बुँदे सर्कुलर, माघ २७ गते पदाधिकारी र पोलिटब्यूरो चयन हुने

काठमाडौं । नेकपा माओवादी केन्द्रले आगामी माघ २७ गते केन्द्रीय समिति बैठक बोलाएको छ ।

पार्टी अध्यक्ष प्रचण्डले एक सुर्कलर जारी गर्दै केन्द्रीय समिति बैठक २७ गते बोलाउने र त्यसमा नै पदाधिकारी समेत चयन गर्ने बताएका छन् ।

माओवादीको पुष ११ देखि १८ गतेसम्म सम्पन्न महाधिवेशनले २ सय ९९ जना केन्द्रीय सदस्य रहने गरी विधान पारित गरेको थियो । समावेशी र समानुपातिक प्रतिनिधित्वका आधारमा माओवादीले २९९ मध्ये ५० प्रतिशत समावेशी कोटामा चयन गरेको थियो । महाधिवेशनको अन्तिम दिन अध्यक्षले २४६ जना केन्द्रीय समिति सदस्य चयन गरेको थियो ।

अध्यक्ष ‘प्रचण्ड’ ले शनिबार आन्तरिक परिपत्र जारी गर्दै रोकिएको केन्द्रीय कमिटी बैठक माघ २७ बाट काठमाडौमा बस्ने र सोही बैठकले पदाधिकारी चयन लगायतका निर्णय गर्ने जनाएपछि संगठनले पूर्णता पाउने भएको हो ।
अध्यक्ष प्रचण्डले जारी गरेको परिपत्रमा सोही मितिमा बस्ने बैठकले केन्द्रीय कमिटीको पूर्णता, पोलिटब्युरो र स्थायी समितिको गठनका साथै पदाधिकारीको निर्वाचन गर्ने उल्लेख छ । प्रचण्डको परिपत्रमा सोही बैठकले केन्द्रीय समितिका सदस्यहरुको कार्यविभिाजनसहित महाधिवेशनले पारित गरेको कार्यदिशा अनुरुप कार्ययोजना निर्माण गर्ने र अन्य आवश्यक निर्णय लिने उल्लेख छ ।

साथै केन्द्रीय समितिको उक्त बैठकबाट अर्को निर्णय नभएसम्मका लागि यसअघिका सबै प्रदेश समिति, जिल्ला समन्वय समिति, विभाग र जनवर्गीय एवं मोर्चा संगठनहरुको इन्चार्जहरुलाई नै यथावत जिम्मेवारी दिने माओवादीको तयारी रहेको देखिन्छ ।
माओवादी केन्द्रका अध्यक्ष प्रचण्डले जारी गरेको परिपत्रमा प्रदेश समितिहरुले प्रदेश समिति र पदाधिकारी निर्वाचनलाई पूर्णता दिने कार्य यथाशीघ्र सम्पन्न गर्न निर्देशन दिएका छन् । प्रचण्डले आगामी बर्ष २०७९ निर्वाचन वर्ष हुने भन्दै त्यसका निम्ति पार्टी पंक्तिलाई आवश्यक अध्ययन विश्लेषण र योजना निर्माणको कार्यका पहल सुरु गर्न पनि निर्देशन दिएका छन् ।

प्रचण्डले माघ १२ मा हुने राष्ट्रियसभा निर्वाचनमा ५ दलीय गठबन्धनका उम्मेदवारहरूलाई विजयी बनाउन समन्वयात्मक ढंगले पार्टी नेता कार्यकर्ताहरुलाई निर्देशन दिएका छन् ।

कमेन्ट गर्नुहोस्