ओली तर्फ संकेत गर्दै अर्थमन्त्रीले भने -विदेशी पानी खाएर हुर्केकाले वृद्धभत्ता दिन नसक्ने अफवाह फैलाए

काठमाडौं । अर्थमन्त्री जनार्दन शर्माले सरकार वृद्धभत्ता नै दिन नसक्ने देशको अर्थतन्त्र डामाडोल भयो भनेर फैलाइएको अफवाहमा कुनैपनि सत्यता नरहेको प्रस्ट पारेका छन् । एमाले अध्यक्ष तथा पूर्वप्रधानमन्त्री केपी शर्मा ओलीले आइतबार मात्रै मुलुकको अर्थतन्त्रप्रति टिप्पणी गर्दै सरकारले वृद्धभत्ता समेत दिन नसक्ने, कर्मचारीहरलाई तलब दिन नसक्ने अवस्था रहेको बताएका थिए । तर अर्थमन्त्री शर्माले सोमबार गरेको पत्रकार सम्मेलनमा त्यस्ता भनाइको खण्डन गर्दै भने, ‘चुनावको रकम पनि दिन नसक्ने, विदेशी पानी खाएर हुर्केका नागरिकहरुको कुरा सुन्यो भने बृद्ध भत्ता पनि दिन नसक्ने कुरा सुन्न सकिन्छ ।’

उनले यस्ता कुरा गर्न र भन्न छुट भएपनि सरकार तेस्तो अवस्थामा नरहेको बताए। ‘भन्न त पाइयो तर बजेट व्यवस्था र उपलब्ध गराएका छौं, श्रोत सुनिश्चितता भएको छ । भुक्तानीको प्रक्रिया भैसकेको छ । नपुग्ने भए अरु दिने प्रतिवद्धता पनि गरिएको छ ती सबै अफवाह हुन्’, मन्त्री शर्माको भनाइ छ ।

उनले यस्तै अफवाह गर्दै नेपाल श्रीलंका बन्छ बन्छ भनेर मुलुकलाई जबर्जस्ती त्यता लैजान खोज्नु राष्ट्रघात भएको भन्दै यस्तो भनेको सुनेर आफुलाई अचम्म लागेको बताए । ‘यी सबै कुराहरुलाई जोड्दै जोड्दै देश श्रीलंका हुन्छ हुन्छ भन्नेतिर लग्न खोजिंदैछ । यो राष्ट्रघात हो । श्रीलंका बनाउने चासो उहाँहरुलाई किन भइरहेको छ, मलाई अचम्म लागेको छ’, मन्त्री शर्माको भनाइ छ । उनले अहिले पनि नेपालको ट्रेजरीमा ६७ अरब रहेको बताउदै अफवाहमा भनिए जस्तो स्थिति देशको नरहेको विश्वास समेत दिलाए ।

आइतबार मात्रै एमाले अध्यक्ष ओलीले मुलुकको मुलुकको पछिल्लो अर्थतन्त्रले अनिष्टको संकेत गरेको भन्दै यही अवस्था रहे जेष्ठ नागरिकहरुले भत्ता नपाउने सम्भावना रहेको बताएका थिए । ‘अनौठो नमान्नुहोला यो नेपालका लागि अनिष्टको समय हो देशका लागि । अहिले देशको अर्थतन्त्र हेर्नुहोस् त श्रीलंका बन्दैछ नेपाल । केही समयपछि तनखा नपाए अनौठो नमान्नुहोला । तनखा दिन सक्ने अवस्था छैन । जेष्ठ नागरिकले भत्ता नपाए अनौठो नमान्नुहोला’, शिक्षक संगठनको कार्यक्रममा ओलीले भनेका थिए ।

कमेन्ट गर्नुहोस्