त्रिचन्द्र क्याम्पसका विद्यार्थीको प्रश्न : धरहरा प्राथमिकतामा पर्दछ , शैक्षिक क्षेत्र किन पर्दैन ?

काठमाडौं । नेपालकै पुरानो कलेज त्रिचन्द्र क्याम्पस जीर्ण भएर ढल्न लाग्दा पनि सरकारको ध्यान नगएको भन्दै प्रदर्शन गरिएको छ ।

क्याम्पस पुनर्निर्माण र आवश्यक पूर्वाधार बनाउनुपर्ने मागसहित विद्यार्थीहरूले मंगलबार बिहान प्रदर्शन गरेका हुन् ।

क्याम्पसबाहिर प्रदर्शनमा उत्रिएका विद्यार्थीले जीर्ण भएको भवन तत्काल पुनर्निर्माण थाल्न माग गरेका थिए । विभिन्न नारा लेखिएका प्लेकार्ड बोकेर प्रदर्शनमा उत्रिएका विद्यार्थीले सांकेतिक विरोधस्वरूप सडकमै पुस्तक पढेका थिए ।

प्लेकार्डसहित विरोधमा उत्रेका विद्यार्थीले ‘प्रधानमन्त्री ज्यू,तपाईं पढेको कलेज कहिले बन्ने, शिक्षा मन्त्रालय हराएको सूचना, सेभ त्रिचन्द्र, इतिहास ढल्दैछ, सरकार मौन छ’ नारा लगाएका थिए ।

‘प्रधानमन्त्रीज्यू, तपाईं पढेको कलेज कहिले बन्नेरु, भ्युटावर बन्ने त्रिचन्द्र नबन्ने ?’ जस्ता नारा लेखिएका प्लेकार्ड बोकेका उनीहरुले कलेज बचाउन माग गरे ।

प्रधानमन्त्री स्वयंले पढेको र नेपालकै ज्येष्ठ कलेज भए पनि यसको सम्बर्धनमा सरकार उदासीन रहेको उनीहरुले बताए ।

केहि समय अघि अखिल(क्रान्तिकारी) त्रि–चन्द्रका अध्यक्ष र क्याम्पस प्रमुख लगायतले माओवादी केन्द्रका अध्यक्ष प्रचण्डलाई भेटेर जीर्ण भएको भवन तत्काल पुनर्निर्माणमा पहल गरिदिन आग्रह गरेका थिए ।

कलेजमा अध्ययनरत विद्यार्थी भवन कुनबेला भत्किन्छ भन्ने डरमा पढ्नुपरेको बताउँछन् । भवनका कक्षाकोठामा पानी परेको बेला पानी चुहिने गरेको उनीहरुले बताए । अध्ययनका लागि क्याम्पस पस्ने विद्यार्थीको संख्या बढीरहे पनि भवन भत्किएर खस्ने हो कि भन्ने डरमा कलेजमा बस्नै डर लाग्न थालेको विद्यार्थीको गुनासो छ ।

कमेन्ट गर्नुहोस्