जनकपुरमा युवा वैज्ञानिक सम्मेलन सुरु(तस्बिरहरु)

काठमाडौं । राष्ट्रिय युवा परिषदले हरेक वर्ष गर्दै आएको राष्ट्रिय युवा वैज्ञानिक सम्मेलन यस पटक धनुषाको जनकपुरधाममा आजदेखि सुरु भएको छ । अघिल्लो वर्ष प्रदेश १ मा आयोजना गरिएको सम्मेलन यस वर्ष मधेश प्रदेशमा आयोजना गरिएको हो ।

मुझेलियास्थित होटल राजदरबारमा असार ९ र १० गते दुई दिनसम्म चल्ने सम्मेलनको उदघाटन मधेश प्रदेशका मुख्यमन्त्री लालबाबु राउतले गरेका छन् । उनले गरिबी र अशिक्षा रहेको प्रदेश मधेसमा गरिएको सम्मेलनको विशेष महत्व रहेको बताए । देशमा डक्टर इन्जिनियर र साइन्स पढ्नेहरुको महत्व बुझ्ने र बझाउने काम गर्नुपर्ने बताए । सम्मेलनमा सातवटै प्रदेशबाट करिब १५० जना सहभागी भएका छन् ।

तस्बिरः अशोक भण्डारी

राष्ट्रिय युवा परिषदका कार्यकारी उपाध्यक्ष सुरेन्द्र बस्नेतले नयाँ वैज्ञानिक आविश्कार, अनुसन्धान र नवप्रवर्तनको क्षेत्रमा युवालाई प्रोत्साहन गर्ने उद्देश्यले सम्मेलन आयोजना गरिएको जानकारी दिए ।

कार्यक्रमको संयोजन गरेका अनुसन्धानदाता टीकाराम भण्डारीले यस पटकको राष्ट्रिय सम्मेलन मधेश विशेष रहेको बताए । उनले भने, ‘राष्ट्रिय सम्मेलन भए पनि यस वर्ष मधेशमा क्रियाशील स्थानीय अनुसन्धानदाता र विद्यार्थीलाई केन्द्रित गरेका छौं ।’

 

विभिन्न विश्वविद्यालय तथा कलेज र अनुसन्धानको क्षेत्रमा क्रियाशीलहरु सम्मेलनमा सहभागी छन् । सम्मेलनमा कृषि, औषधि, विज्ञान, प्रविधि, नवप्रवर्तन सम्बन्धी प्रस्तुति रहने छ । सम्मेलनमा पूर्व विज्ञान प्रविधि तथा वातावरण मन्त्री गणेश शाहको पनि प्रस्तुती छ । ‘समाजको लागि विज्ञान र समृद्धिको लागि नवप्रवद्र्धन’ शीर्षकमा आफ्नो प्रस्तुती रहने उनले जानकारी दिए ।

शुक्रबारको दिन हाईस्कुलका सुनियर र जुनियर विधामा प्रतिस्पर्धात्मक प्रस्तुति रहने भण्डारीले बताए । उत्कृष्ट ठहरिने जुनियर समूहले विदेशमा आयोजना हुने एसिया प्यासिफिक वैज्ञानिक सम्मेलनमा सहभागी हुन पाउने छन् । यो सम्मेलन यस पटक रुसमा हुनुपर्ने भए पनि रुस–युक्रेन द्वन्द्वका कारण मिति निश्चित भइसकेको छैन ।

सम्मेलनको उद्घाटन मधेश प्रदेशका मुख्यमन्त्री लालबाबु राउतले गरेका हुन् । कार्यक्रममा विज्ञान तथा प्रविधि राज्यमन्त्री बोधमाया यादव, मधेश प्रदेशका महिला बालबालिका युवा तथा खेलकुद मन्त्री विरेन्द्र प्रसाद सिंह र युवा तथा खेलकुद मन्त्रालयका सचिव डा.दामोदर रेग्मी लगायत सहभागी छन् ।

कमेन्ट गर्नुहोस्