भारतले सप्तकोसी ब्यारेजको ढोका नखोल्दा २ हजार घरपरिवार जोखिममा

सुनसरी । भारतले सप्तकोसी ब्यारेजका सबै ढोका नखोलेका कारण सुनसरीमा बाढीले कटान तिव्र पारेको छ । सुनसरी र उदयपुरको सिमानामा सप्तकोसीको बाढीले कटान तीब्र बनाएपछि स्थानीयहरु त्रासमा बस्न बाध्य भएका छन् ।

बाढीले चतरा पुलमुनिको ३ किलोमिटरको दुरीमा रहेको डुम्रिबोटेबाट कटान तिव्र पारेको छ । बाढी श्रीलंका टापुतर्फ प्रवेश गरेको स्थानीयले बताएका छन्। कटान तिव्र भएपछि सप्तकोसीको बीच भागमा पर्ने श्रीलंका टापुका झण्डै २ हजार घर परिवार जोखिम मोलेर त्रासमा बस्न बाध्य भएका छन् । बाढीले पश्चिम तटबन्ध भत्काएर कटान थालेको स्थानीयको भनाइ छ । उनीहरुले ब्यारेजका सबै ढोका खोल्न सरकारसँग माग गरेका छन् ।

लगातारको वर्षाका कारण पानीको बहाव बढेपछि कोसी ब्यारेजमा खतराको संकेत स्वरुप रातो बत्ति बालिएको छ । आज सप्तकोसीमा पानीको बहाव प्रतिसेकेण्ड २ लाख २९ हजार १ सय २५ क्युसेक पुगेको छ। पानीको बहाव बढेपछि कोसी ब्यारेजका ५६ मध्य ३२ ढोका मात्रै खोलिएको छ ।

सप्तकोसीमा पानीको बहाव एक लाख ५० हजार क्युसेक नाघेपछि खतरा मानिन्छ ।

भारतको नियन्त्रणमा रहेको कोसी ब्यारेजका सबै ढोका नखोलेका कारण कोसी गाँउपालिका र बराहक्षेत्र नगरपालिकाको खेती योग्य जमिन र मानव बस्ती डुबानमा परेको छ ।

कमेन्ट गर्नुहोस्