समानुपातिक सूचीले रास्वपामा बबन्डर , कार्यकर्ताले घेरे पार्टी कार्यालय

काठमाडौं । रवि लामिछाने नेतृत्वको राष्ट्रिय स्वतन्त्र पार्टीमा समानुपातिकतर्फका उम्मेदवार छनौटलाई लिएर बबन्डर भएको छ।

पार्टीभित्र भएको प्राइमरी इलेक्सनमा कम मत पाएकालाई पनि समानुपातिक सांसदका रुपमा सिफारिस गर्ने तयारी भएपछि विवाद बढेको रास्वपाका एक नेताले बताए ।

अहिले पार्टी केन्द्रीय कार्यालयमा ठूलो संख्यामा नेता कार्यकर्ता भेला भएका छन्। आजै टुंगो गर्न लागिएको बन्दसूचीको विषयलाई लिएर विवाद भैरहेको छ ।

‘निर्वाचन आयोगले मागेको बन्दसूचीको विवरण आजै अन्तिम रुप दिने तयरी छ’, उनले भने, ‘तर केही नामका विषयमा असन्तुष्टि बढ्यो। उहाँहरु कार्यालयमा जम्मा हुनुभएको छ।’

रास्वपाले प्राइमरी इलेक्सन गरेर सबैभन्दा बढी मत ल्याएकालाई समानुपातिक सूचीको पहिलो नम्बरमा राखेको थियो। ४ मंसिरको चुनावमा समानुपतिकतर्फ १३ सिट जितेको छ। समानुपातिकका केही नामहरु रास्वपाले तलमाथि गर्न खोज्दा विवाद सतहमा आएको हो।

सुनसरी क्षेत्र नम्बर २ बाट रास्वपा नेता लालविक्रम थापाले पार्टीलाई सही बाटोमा हिँडाउनुपर्ने बताएका छ्न। उनले आज सवा ११ बजे रास्वपा केन्द्रीय कार्यालय ‘घण्टीघर’मा खबरदारी कार्यक्रममा सहभागी हुन बुधबारै आग्रह गरेका थिए।

कमेन्ट गर्नुहोस्