त्रिविको परीक्षा तालिका सच्याउन क्रान्तिकारीको माग

काठमाडौं । अखिल क्रान्तिकारीको विद्रोही समूह (पवन कार्की) ले परीक्षा तालिका सच्याउन त्रिवि परीक्षा नियन्त्रण कार्यालयको ध्यानाकर्षण गराएको छ ।

पवन कार्कीको नेतृत्वमा गएको क्रान्तिकारीका विद्यार्थी नेताले डेपुटी कन्ट्रोलर घनश्याम ठाकुरसमक्ष ६ बुँदे मागसमेत प्रस्तुत गरेका छन् ।

समयमा परीक्षा नहुने, प्रश्नपत्र आउट हुने, दोहोरिने, वर्षौंसम्म रिजल्ट कुर्नुपर्ने, प्रमाणपत्र समयमा नपाइनेजस्ता समस्या समाधान नगर्नुमा क्रान्तिकारीले विश्वविद्यालयका जिम्मेवार पदाधिकारीहरूको असक्षमता भनेको छ ।

विश्वविद्यालयलाई राजनीतिक भागबन्डाबाट टाढा राख्न पनि सो संगठनको सुझाव छ ।

हालै सार्वजनिक स्नातक प्रथम वर्षको परीक्षा अन्तिम तयारीमा सार्नु, रजिस्ट्रेसन नम्बर समयमै दिन नसक्नु, स्नातक तह चौथो वर्षको पढाई कोर्षको पूरा अवधि पनि नभई परीक्षा फाराम खुलेकै समय परीक्षा तालिका प्रकाशित गरी विद्यार्थीहरूको मनोबल गिराइएको पनि ध्यानाकर्षणपत्रमा उल्लेख छ ।

यस्तो छ क्रान्तिकारीले पेस गरेको माग
१. स्नातक तह चौथो वर्षको परीक्षा तालिका स्ववियु निर्वाचन र विद्यार्थी लाई परीक्षा तयारीको समय दिएर पुनरावलोकन गर्नुपर्ने ।

२। सबै तहका परीक्षा कार्यतालिका शैक्षिक क्यालेण्डर बनाएर सार्वजनिक गर्नुपर्ने ।

३. परीक्षा सकिएको ३ महिना पुरा भैसकेका सबै तहको रिजल्ट १५ दिन भित्र सार्वजनिक गर्नु पर्ने ।

४. परीक्षामा सामेल भएका धेरै विद्यार्थीहरू परीक्षा केन्द्र वा पनीकाको लापरवाहीले बिना कारण एक्सफेल देखाएको हुँदा यसलाई पुनरावलोकन गर्नुपर्ने ।

५.परीक्षा नियन्त्रण कार्यालयका सेवा सुविधा लाई छिटो छरितो बनाउन अनलाइन सिस्टम लागू गर्नु पर्ने ।

६. यस अगाडि अखिल क्रान्तिकारीले बुझाएका मागहरू तत्काल पूरा गर्नुपर्ने ।

कमेन्ट गर्नुहोस्