काठमाडौं । गृहमन्त्री रवि लामिछानेको नागरिकता विवादको रिटमा सुनुवाइ सकिएसँगै सर्वोच्च अदालत परिसरमा सुरक्षा बढाइएको छ । प्रहरीले आवश्यकता अनुसार सो क्षेत्रमा सुरक्षा तैनाथ गरेको प्रहरी परिसर काठमाडौंका एसपी दिनेश मैनालीले बताए ।
गृहमन्त्रीमाथि अमेरिकाको नागरिकता त्याग नगर्दै नेपाली राहदानी प्राप्त गरेको आरोपको मुद्धामा आज फैसला हुँदै छ ।
लामिछानेले अमेरिकाको नागरिकता प्राप्त गरेपछि नेपालको नागरिकता स्वतः खारेज भएको र पुनः नेपालको नागरिकता प्राप्त गर्न नागरिकता सम्बन्धी ऐन, २०६३ बमोजिमको प्रक्रिया पूरा नगरेको आरोप छ ।
मुद्धामा नागरिकता पुनः प्राप्तिको प्रक्रिया नै पूरा नगरेका लामिछाने नेपाली नागरिक नरहेको र गृहमन्त्री, सांसद बन्न अयोग्य रहेको तर्क गरिएको छ ।
सर्वोच्च स्रोतका अनुसार इजलासले आजै फैसला सुनाउने सम्भावना छ।
शुक्रबार सर्वोच्च अदालतको संवैधानिक इजलासले लामिछानेविरूद्ध परेको रिटमा अन्तिम सुनुवाइ गरेको हो।
