काठमाडौं । सर्वोच्च अदालतले क्रिकेटर सन्दीप लामिछानेलाई विदेश जानका लागि स्वीकृति नदिने निर्णय गरेको छ । यसअघि उच्च अदालत पाटनले विदेश जान लगाएको रोक सर्वोचले हटाउन अस्वीकार गरेको हो ।
न्यायाधीश ईश्वर खतिवडाको एकल इजलासले क्रिकेटर लामिछानेको निवेदनउपर आज सुनुवाई गर्दै माग बमोजिमको आदेश दिन अस्वीकार गरेको हो ।
न्यायाधीश खतिवडाको एकल इजलासले उच्च अदालतको धरौटीमा छाड्न दिएको आदेशउपर महान्यायाधिवक्ता कार्यालयले र बलात्कार मुद्दाका अभियुक्त सन्दीप लामिछानेले धरौटीमा छाड्न राखेको सर्त हटाउन दिएको दुवै निवेदन एकैसाथ राखेर आइतबारलाई पेशी तोक्न आदेश दिएको छ ।
पेशी आइतबार तोकिएकाले क्रिकेटर लामिछानेको भोलिको युएई भ्रमण रोकिएको छ ।
आइसिसी विश्वकप क्रिकेट लिग–२ अन्तर्गत युएई र पिएनजी विरुद्धको एक दिवसीय सिरिजका नेपाली टिम भोलि शनिबार युएई जाँदैछ ।युएई र पिएनजी विरुद्धको एक दिवसीय सिरिजका लागि आफू पनि युएई जान पाउनुपर्ने भन्दै सर्वोच्चमा लामिछानेको रिट परेको थियो ।
क्रिकेटर लामिछानेविरुद्ध नाबालिग बलात्कारको अभियोगमा जिल्ला अदालतले पुर्पक्षका लागि थुनामा पठाएको थियो । त्यसबिरुद्ध लामिछानेको पुनरावेदनमा उच्च अदालतले २८ पुसमा २० लाख धरौटीमा छाड्दै उपत्यका छाड्न नपाइने, विदेश जान नपाइने जस्ता सर्तहरू राखेको छ ।
लामिछानेलाई धरौटीमा छाड्ने आदेशविरुद्ध सरकारी वकिलको कार्यालयले पुनरावेदनको निवेदन दिएको छ । यो मुद्दाको पेशी न्यायाधीशद्वय प्रकाशकुमार ढुङ्गाना र हरिप्रसाद फुयाँलको इजलासमा आजका लागि तोकिएको भएपनि हेर्न नभ्याइनेमा परेको छ ।
