तानसेन। सिद्धबावा क्षेत्रमा सुरुङ मार्ग निर्माणको प्रारम्भिक काम गर्न राजमार्ग दिनहुँ नौ घण्टा बन्द गरिने भएको छ । सिद्धार्थ राजमार्गको सिद्धबावा क्षेत्रमा सुरुङ मार्ग निर्माण गर्नका लागि आवश्यक पूर्वाधार निर्माण कार्य सुरु भएको हो ।
सुरुङ मार्ग निर्माणको जिम्मा पाएको निर्माण व्यवसायी चाइना स्टेट कन्स्ट्रक्सन इन्जिनियरिङ कर्पोरेसनको माग अनुसार यही २०७९ चैत २१ गतेदेखि दैनिक नौ घण्टा सडक बन्द हुने भएको हो ।
सडक बन्द गरेर निर्माण व्यवसायीले आवश्यक काम गर्ने जिल्ला प्रशासन कार्यालय पाल्पाले जनाएको छ । सो अनुसार सूचना नभएसम्मका लागि सडक बिहान ११ बजेदेखि २ बजेसम्म र राति १० बजेदेखि बिहान ४ बजेसम्म सडक बन्द हुनेछ ।
तर अत्यावश्यक सवारीसाधन एम्बुलेन्सलगायतलाई भने आवतजावतमा कुनै बाधा हुनेछैन । यसअघि पनि त्यस क्षेत्रमा सुरुङ मार्ग निर्माण गर्न प्रारम्भिक चरणको काम गर्न सडक बन्द गरिएको थियो ।
सिद्धबावा क्षेत्रमा १ हजार १२६ मिटर सुरुङ मार्ग निर्माणका लागि आवश्यक पूर्वाधार निर्माणको काम भइरहेको आयोजना पक्षले जनाएको छ । सुरुङ मार्गको डिपिआर स्वीकृतिको चरणमा रहेका र हाल त्यस क्षेत्रमा जोखिमयुक्त ढुङ्गा निकाल्ने, आवश्यक सामग्री डम्पिङ गर्न पूर्वाधार निर्माण गर्ने काम भइरहेको छ ।
