भक्तपुर । प्रधानमन्त्री पुष्पकमल दाहाल ‘प्रचण्ड’ले सेनाको छवि थप उचाइमा पुर्याउने जिम्मेवारी नवनियुक्त सैनिक क्याडेट अधिकृतहरूमा रहेको बताएका छन् ।
भक्तपुरस्थित सैनिक प्रतिष्ठान खरिपाटीमा आज सि.नं ६० अधिकृत क्याडेट तालिम र सि.नं ५० पदिक तथा बिल्लादार अधिकृत क्याडेट तालिम पुरा गरेका शिक्षार्थीहरूलाई आयुक्त पद प्रदान कवाज प्रदर्शन कार्यक्रममा सम्बोधन गर्दै प्रधानमन्त्री प्रचण्डले उत्कृष्ट ढङ्गबाट सम्पादन मार्फत जनताको सेवामा समर्पित हुँदै नेपाली सेनाको छविलाई थप उचाइमा पुर्याउन आग्रह गरे ।
सम्बोधनको क्रममा प्रधानमन्त्री प्रचण्डले सैनिक सेवाको अन्तिम घडीसम्म सेवा कायम राख्दै राष्ट्र र राष्ट्रवासीको सेवामा तल्लीन हुन निर्देशन समेत दिए ।
प्रधानमन्त्री प्रचण्डले देश भित्र मात्रै नभई देश बाहिर समेत नेपाली शान्ति सेनाको रुपमा विश्वका विभिन्न द्धन्द्धग्रस्त देशहरूमा शान्ति दूतमा रुपमा खटिएर विश्व शान्ति स्थापनार्थ पुर्याएको योगदानले नेपाललाई शान्ति सैनिकहरूको देशको रुपमा चिनाउन सफल भएको बताए ।
प्रधानमन्त्री प्रचण्डले सुरक्षा चुनौतीका साथै भविष्यमा देखा पर्न सक्ने अन्य चुनौतीको सामना गर्न नेपाली सेना सदैव सजग, सतर्क एवं तयार रहने विश्वास व्यक्त गरे।
तालिममा मित्र राष्ट्र बङ्गलादेश, श्रीलङ्का र जाम्बियाका एक–एक जना अधिकृत समेत यो कवाजमा सहभागी भएको र विगतमा पनि विभिन्न मित्र राष्ट्रबाट १० वर्षमा २३ जना आयुक्त भएको भन्दै प्रधानमन्त्रीले खुसी व्यक्त गरे ।
सि.नं ६० अधिकृत क्याडेट तालिममा ८६ जना र सि.नं ५० पदिक तथा बिल्लादार अधिकृत क्याडेट तालिममा ३५ जनाले तीन वर्षे तालिम पुरा गरि आयुक्त पद प्राप्त गर्नु भएको छ । प्रधानमन्त्री प्रचण्डले सि.नं ६० अधिकृत क्याडेट तालिममा उत्कृष्ट हुने कृष्ण खड्का र सि.नं ५० पदिक तथा बिल्लादार अधिकृत क्याडेट तालिममा उत्कृष्ट हुने खगेन्द्र कार्कीलाई खुकुरी तथा महिलातर्फ उत्कृष्ट हुने अप्सरा बुढाथोकीलाई छडि अवार्ड प्रदान गरे ।
कार्यक्रममा उपप्रधान तथा रक्षा मन्त्री पूर्णबहादुर खड्का, प्रधान सेनापति प्रभुराम शर्मा, सुरक्षा निकायका प्रमुखहरूलगायतको सहभागिता रहेको थियो ।