काठमाडौं । सत्तारुढ गठबन्धनका विद्यार्थी सङ्गठनहरूले भ्रष्टाचारविरुद्ध सरकारको कदमप्रति ऐक्यबद्धता जनाएका छन् । बिहीबार भ्रष्टाचारविरुद्धको अभियानलाई समर्थन गर्दै नेपाल विद्यार्थी सङ्घ, अनेरास्ववियु क्रान्तिकारी र नेकपा (एकीकृत समाजवादी) निकट अनेरास्ववियुले संयुक्त प्रर्दशन गरे ।
नक्कली भुटानी शरणार्थी प्रकरणबारे अनुसन्धान गरी भ्रष्टाचारीलाई कारबाही सुरु भएको अवस्थामा कारबाहीलाई थप प्रभावकारी बनाउन माग गर्दै विद्यार्थी सङ्गठनहरूले प्रदर्शन गरेका हुन् । उनीहरुले काठमाडौंको भृकुटीमण्डप परिसरमा प्रदर्शन गरेका हुन् ।
अखिल (क्रान्तिकारी) त्रिचन्द्र क्याम्पस कमिटिले त्रिचन्द्र अगाडी मौन रुपमा प्ले कार्ड देखाएर सरकारको कदमको समर्थन गरेका थिए । साथै,उनीहरूकाे प्रदर्शन त्रिचन्द्र क्याम्पस देखि प्रर्दशनी मार्गसम्म मार्चपास गरेर संयुक्त विद्यार्थी आन्दोलनमा समाहित भएकाे थियाे ।
प्रदर्शनका क्रममा कुराकानी गर्दै नेकपा (माओवादी केन्द्र) निकट विद्यार्थी सङ्गठन अनेरास्ववियु क्रान्तिकारीकी अध्यक्ष पञ्चा सिंहले प्रधानमन्त्री पुष्पकमल दाहाल प्रचण्डले चलाएको अभियानलाई समर्थन गर्न प्रदर्शन गरेको बताइन् । उनले नेपाली जनतामा भ्रष्टाचार गर्ने ठुला दलका नेताहरू राजनीतिक लेनदेनमा लागेको भन्ने जनताको संशयलाई ठिक ढङ्गले छानबिन गरी कारबाही गर्न खबरदारी स्वरूप प्रदर्शनमा आएको बताइन् । उनले निष्पक्ष छानबिन गरी कारबाही नभएसम्म आन्दोलन जारी रहने बताइन् ।
प्रदर्शनका क्रममा नेकपा (एकीकृत समाजवादी) निकट अनेरास्ववियुका अध्यक्ष सुदेश पराजुलीले भुटानी शरणार्थी प्रकरणमा सरकारले थालेको अभियानलाई ऐक्यबद्धता जनाएको बताए । उनले यो घटनाको कुनै पनि दबाबमा नपरीकन पक्राउ गरी छानबिन गर्न आग्रह गरे
सरकारले व्यक्त गरेको साहस र दृढता स्वागतयोग्य रहेको र विगतका सबै भ्रष्टाचारको फाइलहरू खोल्नुपर्ने पराजुलीले बताए ।
