काठमाडौं । नेपाल समाजवादी पार्टीका अध्यक्ष बाबुराम भट्टराईले प्रशासन र न्यायलयमा समयोचित सुधार र राजनीतिक हस्तक्षेपको अन्त्य लगायतका बिषयका लागि पनि सबै राजीतिक दलहरुसँग अपील गरेका छन् ।
बिहिबार एक विज्ञप्ति जारी गर्दै नक्कली भुटानी शरणार्थी प्रकरणमा निष्पक्ष अनुसन्धान गरी यो विषय छिटो तार्किक निष्कर्षमा पु¥याउन राज्यका सम्वन्धित निकाय र पदाधिकारीहरुलाई आग्रह गरेका छन्।
भट्टराईले दृश्य अदृश्य भ्रष्टाचार र अनियमितताका अनगिन्ती प्रकरणले आम नागरिकमा समेत राज्य,राजनीतिक दल र नेताहरुप्रति गम्भीर अविश्वास, आक्रोस बिद्रोह भाव बढ्दै गइरहेको भन्दै त्यसको ज्वलन्त उदाहरण नक्कली भुटानी शरणार्थी प्रकरण भएको उल्लेख गरेका छन् ।
‘आफ्नै देशको नागरिकलाई अनागरिक बनाएर विदेशमा मानव तस्करी गर्नु र त्यस निम्ति राज्यको उच्च तहमा रहेकाहरूले नै निजी लाभका निम्ति राज्य शक्तिको चरम दुरूपयोग गर्नु निकृष्टतम अपराध हो,’ भट्टराईले विज्ञप्तिमा भनेका छन् ।
नक्कली भुटानी शरणार्थी प्रकरणमा अहिलेसम्म नेपाल सरकार र प्रहरी प्रशासनले देखाएको तदारूकतालाई पार्टीले स्वागत गरेको पनि विज्ञप्तिमा उल्लेख छ ।
यो प्रकरणलाई निष्पक्ष ढंगले अनुसन्धानलाई अगाडि बढाएर यसलाई छिटो तार्किक निष्कर्षमा पु¥याउन पनि अध्यक्ष भट्टराईले माग गर्नुभएको छ । कुनै पनि बहानामा अपराधिलाई उन्मुक्ति नदिन र निर्दोषलाई नफसाउन आफ्नो पार्टीले खबरदारी गर्ने पनि भट्टराईले उल्लेख गरेका छन् ।
