पोखरा। नेकपा(माओवादी केन्द्र)का अध्यक्ष पुष्पकमल दाहाल(प्रचण्ड)को नेतृत्वको सरकारले भ्रष्टाचार र ठगीका विरुद्ध सुरु गरेको अभियानमा पोखराका युवा विद्यार्थीहरुले पनि साथ र ऐक्यवद्धता जनाएका छन् ।
अनेरास्ववियू(क्रान्तिकारी)गण्डकी प्रदेश समितिको आयोजनामा आज पोखराको शहीदचोकमा विद्यार्थीहरुले भुटानी शरणार्थीका नाममा संगठित ठगीका विरुद्ध सरकारले सुरु गरेको अभियाप्रति ऐक्ववद्धता जनाउँदै सत्यतथ्य छानविनका लागि सकारात्मक दबाव स्वरुप पम्प्लेट प्रर्दशन गरेका हुन् ।
विद्यार्थीहरुले भ्रष्टाचार अन्त्य गर्ने प्रचण्ड अभियानमा सबैले साथ दिऔँ,अघि बढ प्रचण्ड जनता साथमा छन्,भ्रष्टाचारीलाई फाँसीदे लगायतका नारा लेखिएका पम्प्लेट बोकेका थिए ।
कार्यक्रमा अखिल क्रान्तिकारीका केन्द्रीय सचिव एवं गण्डकी प्रदेशका इन्चार्ज नारायण बडालले नक्कली भुटानी शरणार्थी प्रकरणमा जारी अनुसन्धानलाई अघि बढाउनका लागि दबाब स्वरूप प्रदर्शन गरिएको बताए ।
उनले भने,“ नक्कली भुटानी शरणार्थी प्रकरणमा नाम मुछिएका सबै व्यक्तिमाथि निश्पक्ष छानबिनको माग हामी विद्यार्थीहरुको छ । यसको सत्य तथ्य अनुसन्धानमा सरकारलाई दबाब दिन र दोशीहरुलाई तुरुन्त पक्राउ गर्नका लागि खबरदारी गरेका हौँ ।”
विद्यार्थी नेता बडालले संस्थागत रूपमा भ्रष्टाचार मौलाइरहेको बताउँदै भ्रष्टचारीहरुको सूची सार्वजनिक गर्ने र सरकारले भ्रष्टचारीलाई कार्वाही गर्नुपर्ने बताए।
कार्यक्रममा नेकपा(माओवादी केन्द्र)पोखरा महानगर कमिटीका सचिव जनकराज पराजुलीले प्रचण्ड नेतृत्वको बर्तमान सरकारले इतिहासमै पहिलोपटक भ्रष्टाचारमा नाम मुछिएका ठूला नेताहरुलाई पक्राउ गरी अनुसन्धान अघि बढाएको बताए ।
उनले सरकारको सकारात्मक काममा सबैले साथ दिनुपर्ने र कावाही नगर्न आउन सक्ने दवाव रोक्नका लागि सरकारलाई सबैले सहयोग गर्नुपर्ने बताए ।
