विदेश मन्त्री अमेरिकामा भएका कारण राज्यमन्त्री मिनाक्षी लेखीले गरिन् प्रधानमन्त्रीको स्वागत
काठमाडौं। चारदिने भारत भ्रमणका लागि आज (बुधबार) नयाँदिल्ली पुगेका प्रधानमन्त्री पुष्पकमल दाहाल प्रचण्डलाई इन्दिरा गान्धी अन्तर्राष्ट्रिय विमानस्थलमा भारत सरकारको विदेश राज्यमन्त्री मिनाक्षी लेखीले स्वागत गरेकी छन् ।
भारतका लागि नेपाली राजदूत डा.शंकर शर्माकाअनुसार प्रधानमन्त्री प्रचण्डलाई विदेश राज्यमन्त्री लेखीसहित विदेश मन्त्रालयका अधिकारीहरूले स्वागत गरेका थिए । सो क्रममा प्रधानमन्त्री प्रचण्डको स्वागतका लागि विमानस्थल बाहिर सांस्कृतिक कार्यक्रम तथा झाँकी प्रदर्शन गरिएको थियो ।
यसअघि प्रधानमन्त्री प्रचण्डको स्वागतको लागि भारतीय विदेशमन्त्री एस जयशंकर आउने चर्चा थियो । तर, उनी भारतीय प्रधानमन्त्री नरेन्द्र मोदीको आसन्न महिनामा हुने अमेरिका भ्रमणको तयारीको लागि अमेरिका गएका कारण राज्यमन्त्री मिनाक्षी लेखीले स्वागत गरेकी हुन् ।
