काठमाडौं। उपप्रधानमन्त्री एवम् गृहमन्त्री नारायणकाजी श्रेष्ठले नेपालको राजनीतिक परिवर्तनमा ज्यापु समुदायको अमुल्य योगदान रहेको बताएका छन् । ज्यापु जातिको उत्थान, नेपाल राष्ट्रको निर्माण भन्ने मुल नारासहित काठमाडौंको टुँडिखेलमा आयोजित ज्यापु महागुठीको एकीकृत राष्ट्रिय महाधिवेशन सफलताको शुभकामना दिंदै प्रमुख अतिथिका रूपमा उनले सो कुरा बताएका हुन् ।
‘संघीयता र समावेशीसहित मुलुक यहाँ आइपुग्नुमा ज्यापु समुदायको ठुलो योगदान छ। ०४६ सालको आन्दोलन होस् कि ०६२ ६३ को आन्दोलन, ज्यापु समुदायले आफुलाई अग्रणी र निर्णायक सावित गरेको छ।’ उपप्रधानमन्त्री श्रेष्ठले भने। काठमाडौंको आन्दोलनमा आजका ज्यापु महागुठीका अध्यक्ष राजभाइ जकमीको घरमा बसेर कार्यक्रमहरू बनाईएको समेत उनले स्मरण गरे ।
तर ज्यापु र हरेक समुदायले चाहेजस्तै व्यवस्थासँगै जनताको जीवनस्तर परिवर्तनको चुनौती बाँकी रहेकोले वर्तमान सरकार समृद्धिको मुल प्राथमिकतासहित अगाडि बढेको उनले बताए। ‘समृद्धिका लागि सुशासन, सुशासनका लागि भ्रष्टाचार र अपराधमुक्त समाज, सरकार त्यही अभियानमा छ’, उपप्रधानमन्त्री श्रेष्ठले भने। भ्रष्टाचारीमाथिको कारबाही प्रक्रियाबाट पछाडि नहटिने र दलाल पुँजीका सट्टा राष्ट्रिय पुँजीको प्रवर्द्धन गरिने समेत उनले बताए ।
सामाजिक विविधता भित्रको एकतामा बिग्रह फैलाउने काम त भएको छैन ? यसनिम्ति सचेत हुदै अगाडि बढ्नुपर्ने र ज्यापु जस्तो किसान, श्रमिक र लोक संस्कृतिको संरक्षक समुदायले राष्ट्रको विकासमा अझै प्रभावकारी भुमिका खेल्नुपर्ने उनले बताए ।
