माओवादी केन्द्रीय समिति बैठक ‘विशेष’ हुने संकेतः सबै रिक्त पद र जिम्मेवारी टुंग्याइने, देशव्यापी संगठन सुदृढिकरणको तयारी

काठमाडौं । नेकपा माओवादी केन्द्रको केन्द्रीय समिति बैठक भोलीदेखि बस्न गइरहेको छ ।

भोली बस्ने केन्द्रीय समिति बैठक मुख्यतः राजनीतिक र संगठनात्मक विषयबस्तुमा केन्द्रीत हुने देखिन्छ ।

नेकपाको विभाजनपछि संगठनात्मक सुदृढिकरण गर्न नसकेको माओवादी केन्द्रले यो बीचमा देशका सबै वडातहसम्म संगठन निर्माण गर्न निर्देशन दिएको थियो । तर कतिपय जिल्ला, प्रदेश र अन्य संरचनामा नेकपा विभाजनपछि जिम्मेवारी र पदपूर्ति नभएको कारण उल्लेख्यरुपमा संगठन निर्माण भने हुन सकेको देखिँदैन ।

भोली बस्ने केन्द्रीय कमिटी बैठकमा पछिल्लो राजनीति परिस्थिति र पार्टीले लिनुपर्ने दिशाका बारेमा अध्यक्ष प्रचण्डका तर्फबाट प्रस्ताव पेश हुनसक्ने एक केन्द्रीय सदस्यले बताए । अध्यक्ष प्रचण्डले एमालेसँगको एकतादेखि विभाजन र पछिल्लो समयमा एमाले अध्यक्ष तथा तत्कालिन प्रधानमन्त्री केपी शर्मा ओलीको कदम र वाम–लोकतान्त्रिक गठबन्धनको सरकारसमेत विषयलाई समेटेर संश्लेषणसहित आगामी कार्यभारका बारेमा प्रस्तावमा उल्लेख गर्नसक्ने उनले बताए । अहिले पार्टी कमजोर अवस्थामा रहेको, प्रतिगमनको खतरा कायमै रहेको अवस्थामा पार्टीले राजनीति र संगठनका क्षेत्रमा निर्वाह गर्नुपर्ने दायित्व तथा पार्टी सदस्यहरुको भूमिकाका बारेमा प्रचण्डको प्रतिवेदनले दिशा निर्देश गर्नसक्ने देखिन्छ ।
अध्यक्ष प्रचण्डले क्रान्तिका बाँकी कार्यभार पुरा गर्दै एकीकृत कम्युनिष्ट आन्दोलनको निर्माणमा जोड दिँदै आएका छन् । नेकपासँगको एकता प्रक्रियाले सार्थकता नपाएपनि समाजवादी क्रान्तिको पक्षमा रहेका कम्युनिष्ट शक्तिहरुबीच बृहत रणनीतिक मोर्चा र संगठनात्मक एकताको पक्षमा उनले जोड दिँदै आएका छन् । अध्यक्षको राजनीतिक प्रतिवेदनले अहिलेको अन्यौलतालाई चिर्ने र पार्टीको ठोस कार्यदिशा र कार्यनीतिका बारेमा केन्द्रीय सदस्यहरुलाई प्रशिक्षित पार्ने अपेक्षा केन्द्रीय सदस्यहरुको छ ।

यसैगरी माओवादीले नेकपा विभाजनपछि रिक्त रहेका सबै पद र जिम्मेवारी पूर्ति गर्न समेत लामो गृहकार्य गरेको छ । संगठनात्मक विषयमा आवश्यक गृहकार्य गर्न यसअघि नै स्थायी समिति सदस्य वर्षमान पुनको नेतृत्वमा कार्यदल गठन गरिएको थियो । कार्यदलले सबै क्षेत्रसँग समन्वय गर्दै प्राप्त सुझावका आधारमा अध्यक्षलाई प्रतिवेदन बुझाएको थियो ।

भोलीदेखि शुरु हुने बैठकमा स्थायी र केन्द्रीय समितिदेखि प्रदेश, जिल्ला, जनवर्गीय संगठन, विभागलगायतका सबै संरचनामा रिक्त जिम्मेवारीका बारेमा संगठनात्मक एकता तथा सुदृढिकरणको प्रस्ताव पेश हुनसक्ने देखिन्छ ।

माओवादीले तत्कालका लागि केन्द्रीय समिति बिस्तार नगरेर २०–२५ जना केन्द्रीय सदस्य थप गर्ने देखिन्छ । यसैगरी सुदूरपश्चिमलगायत अन्य प्रदेशमा नेकपा विभाजनपछि रिक्त रहेका पदहरुमा समेत जिम्मेवारी बाँडफाँडको निर्णय बैठकले गर्नसक्ने देखिन्छ ।

केही जिल्लामा पार्टी एकतापछि इन्चार्ज, अध्यक्ष लगायतका पदाधिकारी रिक्त भएकोले त्यसलाई समेत टुंगो लगाउने तयारी भइरहेको ती केन्द्रीय सदस्यले बताए ।

माओवादीले विगतको निर्मम समीक्षा गर्दै राजनीतिक मार्गचित्र र संगठनात्मक सुदृढिकरणका क्षेत्रमा टुटेको कडी जोडन यो बैठक विशेष महत्वको हुने एकजना स्थायी समिति बैठकले बताए । जनता र कार्यकर्ता नेतामुखी भएको अवस्थाले अहिलेको अवस्था सिर्जना गरेकोले यो बैठकमा जनतातर्फ फर्क भन्ने नारालाई कार्यान्वयन गर्ने ठोस योजना बैठकमा उठ्ने उनले बताए ।

अहिले वैचारिकरुपमा प्रतिबद्ध संगठन निर्माणमा नै मुख्य जोड दिने कार्यनीतिका पक्षमा अधिकांश केन्द्रीय सदस्यहरु रहेका छन् । पार्टीले महाधिवेशन गर्नुपर्ने र निर्वाचनको समेत तयारी गर्नुपर्ने भएकाले देशैभरी सबै तहमा पार्टी र जनवर्गीय संगठनका सबै संरचना सुदुृढ गर्ने तथा जनअभियानमार्फत जनतामा पार्टीको नीति तथा कार्यक्रम लैजानेतर्फ बैठकले ठोस मार्गनिर्देशन गर्नसक्ने देखिन्छ ।