सम्पत्ति शुद्धीकरण मुद्दामा तामाङ दोषी
काठमाडौं । विशेष अदालतले तत्कालीन संविधान सभाका सदस्य, एमाले नेता इच्छाराज तामाङलाई सम्पत्ति शुद्धीकरण मुद्दामा दोषी ठहर गरेको छ । विशेष अदालतका अध्यक्ष टेकनारायण कुँवर तथा सदस्यद्वय तेजनारायणसिंह राई र मुरारीबाबु श्रेष्ठको इजलासले तामाङलाई दोषी ठहर गरेको हो ।
सो मुद्दामा अदालतले तामाङ पत्नी सिर्जना, केशवलाल श्रेष्ठ र मीनाकुमारी श्रेष्ठलाई पनि दोषी ठहर गरेको छ । प्रतिवादी बनाइएका इच्छाराजकै छोरीहरू प्रतिष्ठा तामाङ र प्रतीक्षा तामाङलाई भने अदालतले सफाइ दिएको छ ।
सिभिल सहकारीका अध्यक्षसमेत रहेका इच्छाराज तामाङलाई यसअघि नै थुनामा पठाएको थियो । सहकारी ठगीको मुद्दा भने जिल्ला अदालतमा विचाराधीन छ ।
सम्पत्ति शुद्धीकरण अनुसन्धान विभागले इच्छाराज तामाङसहित छ जनाविरुद्ध २०७९ भदौ १६ गते मुद्दा दायर गरेको थियो । विभागले सबै प्रतिवादीसँग गरी झन्डै पाँच अर्ब रुपियाँ बिगो दाबी गरेको थियो । उनीहरूका नाममा रहेको जग्गा र अन्य सम्पत्ति जफतको दाबी पनि विभागले गरेको थियो ।
गैरकानुनी रूपमा आर्जन गरेको सम्पत्ति श्रीमती, छोरीसमेतका नाममा राखेको आरोप तामाङमाथि विभागले लगाएको थियो । श्रीमतीका नाममा अचल सम्पत्ति रहेको जिकिर विभागको थियो । यस्तै छोरीहरूको नाममा घरजग्गा र सेयरसमेत रहेको दाबी विभागले अभियोगपत्रमा लिएको थियो ।
विभागले इच्छाराज तामाङसँग तीन अर्ब ३१ करोड रुपियाँ बिगो दाबी गरेको थियो । यस्तै श्रीमती सिर्जनासँग एक अर्ब तीन करोड, छोरीहरू प्रतीक्षासँग छ करोड २२ लाख र प्रतिष्ठासँग एक करोड ८९ लाख रुपियाँ बिगो दाबी गरेर मुद्दा दायर गरेको थियो । अदालतले दुवै छोरीलाई भने अभियोगबाट सफाइ दिएको छ । यस्तै विभागले सिभिल सहकारीका तत्कालीन अध्यक्ष केशवलालसँग २६ करोड रुपियाँ बिगो दाबी गरेको थियो ।
२०७९ भदौ १६ मा दायर मुद्दामा विशेष अदालतले तामाङलाई थुनामै राख्न आदेश गरेको थियो । पछिल्लो समय विशेष अदालतमा अध्यक्ष र नयाँ सदस्यको पदस्थापनपछि मुद्दालाई सुनुवाइको प्राथमिकतामा राखिएको थियो । विशेषले पुस १ गतेदेखि मुद्दाको नियमित सुनुवाइ प्रारम्भ गरेको थियो । पुस २ गतेदेखि मुद्दाको सुनुवाइ निरन्तर गरिएको थियो ।
वडाध्यक्ष यादवको हत्या आरोपमा दुई आरोपी पुर्पक्षका लागि थुनामा
महोत्तरी । महोत्तरीको रामगोपालपुर नगरपालिका- २ का वडाध्यक्ष मुकेशकुमार यादवको हत्या आरोपमा दुई आरोपीलाई जिल्ला अदालत महोत्तरीले पुर्पक्षका लागि थुनामा पठाएको छ । इजलास नं. ४ मा भएको थुनछेक बहसपछि न्यायाधीश नवराज दुलालको एकल इजलासले औरही नगरपालिका- ७ निवासी सञ्जीव झा र दिलीपकुमार मण्डललाई पुर्पक्षका लागि थुनामा राख्न आदेश दिएको हो । गत भदौ ९ गते जलेश्वर–बर्दीबास सडकखण्डमा पर्ने बर्दीबास- ८ स्थित कल्भर्टनजिकै वडाध्यक्ष यादव मृत अवस्थामा फेला परेका थिए । वडाध्यक्ष यादवकाे मृत्यु शंकास्पद देखिएपछि प्रहरीले अनुसन्धान गरेकाे थियाे । प्रहरीकाे अनुसन्धानपश्चात् दुवै आरोपीलाई नियन्त्रणमा लिई अदालतमा पेस गरेको थियो । जिल्ला अदालत महोत्तरीकी श्रेस्तेदार नूतन झाले सोमबार बयान भएको र मंगलबार बहसपछि पुर्पक्षमा राख्न न्यायाधीशले आदेश दिएको जानकारी दिइन् । पीडित पक्षले सोमबार र मंगलबार अदालतको मुख्य गेटअगाडि धर्नासमेत दिएको थियो ।
एभरेष्ट दैनिक
५८ मिनेट अघि
प्रधानमन्त्रीले ३ बजे सय दिनका उपलब्धि सार्वजनिक गर्ने
काठमाडौँ । सरकारको सय दिन पार गरेको अवसरमा बसेको सत्तारुढ दलको बैठक सकिएको छ । प्रधानमन्त्री निवास बालुवाटारमा बसेको बैठकमा सरकारको सय दिनका उपलब्धि सार्वजनिक गर्न र आगामी दिनमा गर्ने कामका बारेमा प्रधानमन्त्री केपी शर्मा ओलीले आज दिउँसो तीन बजे सम्बोधन गर्ने निर्णय गर्नुभएको हो ।
एभरेष्ट दैनिक
१ घण्टा अघि
सुनको मूल्यमा नयाँ कीर्तिमान, कतिमा भैरहेको छ कारोबार ?
काठमाडौँ । नेपाली बजारमा बुधबार सुनको मूल्यमा फेरि नयाँ कीर्तिमान कायम भएको छ । नेपाल सुनचाँदी व्यवसायी महासंघका अनुसार मंगलबारको तुलनामा बुधबार छापावाल सुनको मूल्य तोलामा ८०० रुपैयाँ बढेको छ । यससँगै स्थानीय बजारमा छापावाल सुनको मूल्य तोलामा १ लाख ६६ हजार ७०० रुपैयाँ कायम भएको महासंघले जनाएको छ । जुन मूल्य हालसम्मकै उच्च हो । यसअघि मंगलबार सुनको मूल्य तोलामा १ लाख ६५ हजार ९०० रुपैयाँ कायम भएको थियो । यस्तै बुधबार छापावाल सुन प्रति १० ग्राम १ लाख ४२ हजार ९२० रुपैयाँ कायम भएको छ । यस्तै मंगलबार चाँदीको मूल्य पनि बढेको छ । मंगलबार तोलामा २ हजार १०० रुपैयाँ कायम भएको चाँदीको मूल्य बुधबार बढेर २ हजार १३५ रुपैयाँ कायम भएको महासंघले जनाएको छ ।
एभरेष्ट दैनिक
२ घण्टा अघि
बुद्धिजीवी संगठनद्वारा बाढीपहिरो पीडितलाई पाँच लाख बढी सहयोग
काठमाडौं । नेकपा (माओवादी केन्द्र)निकट नेपाल बुद्धिजीवी संगठनले बाढीपहिरो पीडितको सहयोगका लागि पाँच लाख पच्चीस हजार सहयोग हस्तान्तरण गरेको छ । माओवादी केन्द्रले स्थापना गरेको केन्द्रीय राहत कोषमा रहने गरी संगठनले सो रकम हस्तान्तरण गरेको हो । पार्टी अध्यक्ष पुष्पकमल दाहाल ‘प्रचण्ड’लाई संगठनका अध्यक्ष कृष्ण केसी लगायतका पदाधिकारीहरुले चेक हस्तान्तरण गर्नुभएको थियो । कार्यक्रममा संगठनका इञ्चार्ज खिमलाल देवकोटालगायत बुद्धिजीवी संगठनका पदाधिकारीहरुको सहभागिता रहेको थियो । चेक ग्रहण गर्दै अध्यक्ष प्रचण्डले बाढीपहिरो पीडितको सहयोगका लागि बुद्धिजीवी संगठनले लिएको पहलकदमीका लागि धन्यवाद दिनुभयो । पार्टीले बाढीपहिरो पीडितको उद्धार, राहत र पुनर्स्थापनाका लागि पहलकमदी लिएको जानकारी दिंदै उहाँले सरकारको ध्यानाकर्षण गराउने र पार्टी आफैले पनि कार्यकर्ता परिचालन गर्ने काम गरेको बताउनुभयो । यसपटक विपतबाट ठूलो क्षति भएकाले सबै मिलेर अब पुनर्निर्माण र पुनर्स्थापनामा जोड दिनुपर्ने बताउनुभयो ।
एभरेष्ट दैनिक
३ घण्टा अघि
